കുവൈത്ത് സിറ്റി: കുവൈത്തിലെ സിവിൽ ഇൻഫർമേഷൻ അതോറിറ്റി, കെട്ടിട ഉടമകൾക്കായി പുതിയ ഡിജിറ്റൽ സേവനം അവതരിപ്പിച്ചു. തങ്ങളുടെ കെട്ടിടങ്ങളിൽ താമസിക്കുന്ന വാടകക്കാരുടെ സിവിൽ ഐഡി വിവരങ്ങൾ നേരിട്ട് നിരീക്ഷിക്കാനും പരിശോധിക്കാനും ഈ സേവനത്തിലൂടെ സാധിക്കും. കെട്ടിട ഉടമകൾക്ക് അവരുടെ പ്രോപ്പർട്ടികളിൽ രജിസ്റ്റർ ചെയ്തിട്ടുള്ള വ്യക്തികളുടെ ഔദ്യോഗിക താമസ വിവരങ്ങൾ സ്വയം പരിശോധിക്കാം.വാടകക്കാരുടെ വിവരങ്ങളിൽ എന്തെങ്കിലും പിശകുകളോ അല്ലെങ്കിൽ താമസിക്കാത്തവരുടെ പേരുകളോ കണ്ടെത്തിയാൽ, പ്ലാറ്റ്ഫോമിലൂടെ തന്നെ നേരിട്ട് പരാതി നൽകാൻ സാധിക്കും. ഇതിനായി ഓഫീസുകൾ സന്ദർശിക്കേണ്ടതില്ല. സിവിൽ ഐഡി ഡാറ്റാബേസിലെ വിവരങ്ങളുടെ കൃത്യത ഉറപ്പാക്കാനും വ്യാജ വിലാസങ്ങൾ ഉപയോഗിക്കുന്നത് തടയാനും ഇത് സഹായിക്കും. ഈ സേവനം കുവൈത്തിന്റെ ഏകീകൃത സർക്കാർ ആപ്പായ ‘സഹൽ’ വഴി ലഭ്യമാണ്. തന്റെ കെട്ടിടത്തിൽ എത്രപേർ താമസിക്കുന്നുണ്ടെന്നും അവർ നിയമപരമായ രേഖകൾ ഉള്ളവരാണോ എന്നും ഉടമയ്ക്ക് എപ്പോഴും അറിയാം. താമസരേഖകളിലെ തെറ്റുകൾ വേഗത്തിൽ തിരുത്താനും ഡാറ്റാബേസ് കാലികമായി നിലനിർത്താനും ഇത് സഹായിക്കുന്നു.
