കുവൈത്ത് സിറ്റി: രാജ്യത്തെ പൊതുസുരക്ഷ വർദ്ധിപ്പിക്കുന്നതിനും അടിയന്തര സാഹചര്യങ്ങളിൽ അതിവേഗം പ്രതികരിക്കുന്നതിനുമായി കുവൈത്ത് ഫയർ ഫോഴ്സ് രണ്ട് പുതിയ അഗ്നിശമന നിലയങ്ങൾ കൂടി തുറന്നു. അൽ-ഖൈറവാനിലും അൽ-മുത്ലയിലുമാണ് അത്യാധുനിക സജ്ജീകരണങ്ങളോടെയുള്ള ഈ കേന്ദ്രങ്ങൾ പ്രവർത്തനമാരംഭിച്ചത്.കുവൈത്ത് ഫയർ ഫോഴ്സ് മേധാവി മേജർ ജനറൽ തലാൽ അൽ-റൂമി നിലയങ്ങൾ ഔദ്യോഗികമായി ഉദ്ഘാടനം ചെയ്തു.അത്യാധുനിക സാങ്കേതികവിദ്യയും നൂതനമായ അഗ്നിശമന ഉപകരണങ്ങളും ഈ സ്റ്റേഷനുകളിൽ ലഭ്യമാക്കിയിട്ടുണ്ട്. ജനവാസ മേഖലകളിലും തന്ത്രപ്രധാനമായ ഇടങ്ങളിലും അപകടങ്ങൾ കുറയ്ക്കുകയാണ് ഇതിലൂടെ ലക്ഷ്യമിടുന്നത്.ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ-യൂസഫ് അൽ-സൗദ് അൽ-സബാഹിന്റെ നിർദ്ദേശപ്രകാരമാണ് അഗ്നിശമന സേവനങ്ങളുടെ വിപുലീകരണം നടക്കുന്നത്.അൽ-മുത്ല പോലെ പുതുതായി വികസിച്ചുവരുന്ന പാർപ്പിട മേഖലകളിൽ തീപിടുത്തമോ മറ്റ് അപകടങ്ങളോ ഉണ്ടായാൽ രക്ഷാപ്രവർത്തകർക്ക് വളരെ വേഗത്തിൽ സംഭവസ്ഥലത്തെത്താൻ ഇത് സഹായിക്കും. ഫയർ ഫോഴ്സിന്റെ പ്രവർത്തനക്ഷമത വർദ്ധിപ്പിക്കുന്നതിനും പൊതുജനങ്ങളുടെ ജീവനും സ്വത്തിനും കൂടുതൽ സുരക്ഷ ഉറപ്പാക്കാനും ഈ നീക്കം സഹായിക്കുമെന്ന് ഫയർ ഫോഴ്സ് പബ്ലിക് റിലേഷൻസ് ഡയറക്ടർ ബ്രിഗേഡിയർ ജനറൽ മുഹമ്മദ് അൽ-ഗരീബ് വ്യക്തമാക്കി.
