കുവൈത്ത്സിറ്റി: കുവൈത്ത് ജനറൽ ട്രാഫിക് ഡിപ്പാർട്ട്മെന്റ് നടത്തിയ വ്യാപക പരിശോധനയിൽ ലൈസൻസില്ലാതെ വാഹനമോടിച്ച എട്ട് പ്രായപൂർത്തിയാകാത്തവർ പിടിയിലായി. റോഡ് സുരക്ഷ ഉറപ്പാക്കുന്നതിനും അപകടകരമായ ഡ്രൈവിംഗ് രീതികൾ തടയുന്നതിനുമായി ആഭ്യന്തര മന്ത്രാലയം നടപ്പിലാക്കുന്ന കർശന സുരക്ഷാ പദ്ധതിയുടെ ഭാഗമായാണ് ഈ നടപടി. പ്രായപൂർത്തിയാകാത്തവർ ലൈസൻസില്ലാതെ വാഹനങ്ങൾ നിരത്തിലിറക്കുന്നത് പൊതുജനങ്ങളുടെ ജീവനും സ്വത്തിനും വലിയ ഭീഷണിയാണെന്ന് സുരക്ഷാ വൃത്തങ്ങൾ ചൂണ്ടിക്കാട്ടി. ഇത്തരം നിയമലംഘകർക്കെതിരെ അടുത്തിടെ ശക്തമാക്കിയ പരിശോധനകൾ അപകടങ്ങളുടെ എണ്ണത്തിൽ കുറവുണ്ടാക്കാൻ സഹായിച്ചിട്ടുണ്ട്. പ്രത്യേകിച്ച് അശ്രദ്ധമായ ഡ്രൈവിംഗ് മൂലമുണ്ടാകുന്ന ഗുരുതരമായ വാഹനാപകടങ്ങൾ ഒരു പരിധിവരെ നിയന്ത്രിക്കാൻ ഈ നീക്കങ്ങളിലൂടെ സാധിച്ചു.പുതുവർഷാഘോഷങ്ങളോടനുബന്ധിച്ച് രാജ്യത്തുടനീളം സുരക്ഷാ നിരീക്ഷണം ശക്തമാക്കിയിരുന്നു. ലൈസൻസില്ലാത്ത പ്രായപൂർത്തിയാകാത്ത ഡ്രൈവർമാരെ കണ്ടെത്താൻ വരും ദിവസങ്ങളിൽ കൂടുതൽ സ്ക്വാഡുകളെ നിയോഗിക്കുമെന്നും പരിശോധനകൾ വ്യാപിപ്പിക്കുമെന്നും ട്രാഫിക് വിഭാഗം അറിയിച്ചു. രക്ഷിതാക്കൾ തങ്ങളുടെ മക്കൾ നിയമം ലംഘിക്കുന്നില്ലെന്ന് ഉറപ്പുവരുത്തണമെന്നും അല്ലാത്തപക്ഷം കടുത്ത നിയമനടപടികൾ നേരിടേണ്ടി വരുമെന്നും അധികൃതർ മുന്നറിയിപ്പ് നൽകി.
