കുവൈത്ത് സിറ്റി: കുവൈത്തിന്റെ ഭൂമിശാസ്ത്രപരമായ പ്രത്യേകതകളും ചരിത്ര പൈതൃകവും വിളിച്ചോതുന്ന ‘കുവൈത്ത് ജിയോപാർക്ക്’പദ്ധതിക്ക് തുടക്കമായി. കുവൈത്ത് ബേയുടെ വടക്കൻ മേഖലയിൽ ഒരുക്കിയിരിക്കുന്ന ഈ ബൃഹത്തായ പദ്ധതി ഇൻഫർമേഷൻ-സാംസ്കാരിക മന്ത്രിയും യുവജനകാര്യ സഹമന്ത്രിയുമായ അബ്ദുറഹ്മാൻ അൽ മുതൈരി വ്യാഴാഴ്ച ഉദ്ഘാടനം ചെയ്തു. കുവൈത്തിന്റെ സാംസ്കാരികവും വിദ്യാഭ്യാസപരവുമായ വിനോദസഞ്ചാരത്തിന് പുത്തൻ ഉണർവ് നൽകാനാണ് ഈ പദ്ധതിയിലൂടെ ലക്ഷ്യമിടുന്നത്.രാജ്യത്തെ ദേശീയ പദ്ധതികൾക്ക് രാഷ്ട്രീയ നേതൃത്വം നൽകുന്ന വലിയ പിന്തുണയുടെ പ്രതിഫലനമാണ് ഈ ജിയോപാർക്കെന്ന് മന്ത്രി വ്യക്തമാക്കി. കുവൈത്തിന്റെ തനതായ ഭൂപ്രകൃതിയെയും ചരിത്രപരമായ അടയാളങ്ങളെയും സംരക്ഷിക്കാനും അവ പൊതുജനങ്ങൾക്ക് പരിചയപ്പെടുത്താനും ഈ പാർക്ക് സഹായിക്കും. സർക്കാർ മേഖല, സിവിൽ സൊസൈറ്റി, സ്വകാര്യ മേഖല എന്നിവയുടെ പങ്കാളിത്തത്തോടെയാണ് ഈ പദ്ധതി നടപ്പിലാക്കിയിരിക്കുന്നത്. നാഷണൽ കൗൺസിൽ ഫോർ കൾച്ചർ, ആർട്സ് ആൻഡ് ലെറ്റേഴ്സിന്റെയും (NCCAL) ഇൻഫർമേഷൻ മന്ത്രാലയത്തിന്റെയും പുതിയ നയരൂപീകരണത്തിന്റെ ഭാഗമായാണ് ജിയോപാർക്ക് യാഥാർത്ഥ്യമായത്. വിദേശ വിനോദസഞ്ചാരികളെ ആകർഷിക്കുന്നതിനൊപ്പം വിദ്യാർത്ഥികൾക്കും ഗവേഷകർക്കും കുവൈത്തിന്റെ മണ്ണിനെക്കുറിച്ച് പഠിക്കാനുള്ള ഒരു തുറന്ന വേദിയായും ജിയോപാർക്ക് മാറും.
