കുവൈറ്റ് സിറ്റി: കുവൈറ്റിലെ ആറ് ഗവർണറേറ്റുകളിലുമുള്ള നിർമ്മാണ സൈറ്റുകളിൽ സുരക്ഷാ മാനദണ്ഡങ്ങൾ ഉറപ്പാക്കുന്നതിനായി മുനിസിപ്പാലിറ്റി പ്രത്യേക പരിശോധനകൾ ആരംഭിച്ചു. നിർമ്മാണ-നവീകരണ പ്രവർത്തനങ്ങൾ നടക്കുന്ന ഇടങ്ങളിൽ സുരക്ഷാ മുൻകരുതലുകൾ പാലിക്കുന്നുണ്ടോ എന്നും നിയമലംഘനങ്ങൾ നടക്കുന്നുണ്ടോ എന്നും നിരീക്ഷിക്കുന്നതിനാണ് പബ്ലിക് റിലേഷൻസ് ഡിപ്പാർട്ട്മെന്റ് ഈ ഫീൽഡ് കാമ്പയിനുകൾ സംഘടിപ്പിക്കുന്നത്.
ഫർവ്വാനിയ ഗവർണറേറ്റിലെ സേഫ്റ്റി ഡിപ്പാർട്ട്മെന്റ് സൂപ്പർവൈസറി ടീം കഴിഞ്ഞ ദിവസങ്ങളിൽ വിവിധ നിർമ്മാണ സൈറ്റുകളിൽ വ്യാപകമായ പരിശോധന നടത്തി. നിർമ്മാണ ചട്ടങ്ങൾ ലംഘിക്കുന്നവരെ കണ്ടെത്തുക, സൈറ്റുകളിൽ ആവശ്യമായ സുരക്ഷാ ക്രമീകരണങ്ങൾ ഉണ്ടെന്ന് ഉറപ്പുവരുത്തുക, നിയമലംഘകർക്കെതിരെ കർശനമായ മേൽനോട്ട നടപടികൾ സ്വീകരിക്കുക എന്നിവയായിരുന്നു ഈ ദൗത്യത്തിന്റെ ലക്ഷ്യം. സുരക്ഷാ ചട്ടങ്ങളും നിബന്ധനകളും കൃത്യമായി പാലിക്കുന്നുണ്ടെന്ന് ഉറപ്പാക്കാൻ പരിശോധനകൾ അത്യാവശ്യമാണെന്ന് അധികൃതർ വ്യക്തമാക്കി.
ഗവർണറേറ്റിലെ വിവിധ മേഖലകളിലായി ഇരുപതോളം നിർമ്മാണ സൈറ്റുകൾ പരിശോധിച്ചതിൽ നിന്ന് 13 സുരക്ഷാ മുന്നറിയിപ്പുകൾ അധികൃതർ പുറപ്പെടുവിച്ചു. സുരക്ഷാ ക്രമീകരണങ്ങളിൽ വീഴ്ച വരുത്തിയതായി കണ്ടെത്തിയതിനെത്തുടർന്നാണ് ഈ നടപടി. വരും ദിവസങ്ങളിലും പരിശോധനകൾ തുടരുമെന്നും നിർമ്മാണ മേഖലയിലെ തൊഴിലാളികളുടെയും പൊതുജനങ്ങളുടെയും സുരക്ഷ ഉറപ്പാക്കുന്നതിൽ യാതൊരുവിധ വിട്ടുവീഴ്ചയും ഉണ്ടാകില്ലെന്നും മുനിസിപ്പാലിറ്റി അറിയിച്ചു.
