കുവൈത്ത് സിറ്റി: ഗൾഫ് മേഖലയിലെ നിലവിലെ പ്രാദേശിക സാഹചര്യം പരിഗണിച്ച് കുവൈത്തിൽ നടത്താനിരുന്ന CBSE പത്താം ക്ലാസ്, പ്ലസ് ടു പരീക്ഷകൾ മാറ്റിവെച്ചതായി Embassy of India, Kuwait പുറത്തിറക്കിയ വാർത്താക്കുറിപ്പിൽ അറിയിച്ചു. മാർച്ച് 5 (05.03.2026), മാർച്ച് 6 (06.03.2026) തീയതികളിൽ നടത്താനിരുന്ന പരീക്ഷകളാണ് മാറ്റിവെച്ചിരിക്കുന്നത്. പുതുക്കിയ തീയതികൾ പിന്നീട് അറിയിക്കുമെന്ന് അധികൃതർ വ്യക്തമാക്കി.
കൂടാതെ, മാർച്ച് 7 (07.03.2026) മുതൽ നടത്താനിരുന്ന പരീക്ഷകളുടെ ഷെഡ്യൂളിനെ കുറിച്ച് മാർച്ച് 5ന് അവലോകനം നടത്തിയ ശേഷം അനുയോജ്യമായ തീരുമാനം CBSE പ്രഖ്യാപിക്കുമെന്നും അറിയിച്ചു. വിദ്യാർത്ഥികൾ തങ്ങളുടെ സ്കൂൾ അധികൃതരുമായി നിരന്തരം ബന്ധപ്പെടുകയും ഔദ്യോഗിക അറിയിപ്പുകൾ ശ്രദ്ധാപൂർവം പിന്തുടരുകയും ചെയ്യണമെന്ന് എംബസി നിർദേശിച്ചു.
