കുവൈത്ത് സിറ്റി: മിസൈൽ അവശിഷ്ടം ഒരു ആംബുലൻസ് സെന്ററിന് സമീപം വീണതിനെ തുടർന്ന് മെഡിക്കൽ എമർജൻസി ടീമിലെ രണ്ട് അംഗങ്ങൾക്ക് പരിക്കേറ്റതായി ആരോഗ്യ മന്ത്രാലയത്തിന്റെ ഔദ്യോഗിക വക്താവ് ഡോ. അബ്ദുല്ല അൽ-സനദ് അറിയിച്ചു.സംഭവത്തിന് പിന്നാലെ എമർജൻസി ടീമുകൾ ഉടൻ ഇടപെട്ട് ആദ്യ ശുശ്രൂഷ നൽകിയ ശേഷം പരിക്കേറ്റവരെ സമീപ ആശുപത്രിയിലേക്ക് മാറ്റി. ഇരുവരുടെയും ആരോഗ്യനില സ്ഥിരമാണെന്നും ആവശ്യമായ ചികിത്സ ലഭിക്കുകയാണെന്നും അദ്ദേഹം വ്യക്തമാക്കി.
സംഭവത്തെക്കുറിച്ച് ബന്ധപ്പെട്ട അധികാരികളെ അറിയിച്ചിട്ടുണ്ടെന്നും ആരോഗ്യ മന്ത്രാലയം മറ്റ് ഏജൻസികളുമായി ചേർന്ന് സ്ഥിതി നിരീക്ഷിക്കുകയാണെന്നും അദ്ദേഹം പറഞ്ഞു.ആരോഗ്യ സേവനങ്ങളുടെ പ്രവർത്തനത്തിൽ യാതൊരു തടസ്സവും ഉണ്ടായിട്ടില്ലെന്നും, രാജ്യത്തെ ആരോഗ്യ സേവനങ്ങൾ സാധാരണ നിലയിൽ തുടരുകയാണെന്നും മന്ത്രാലയം വ്യക്തമാക്കി. കൂടാതെ പരിക്കേറ്റവർക്ക് വേഗത്തിൽ സുഖം പ്രാപിക്കട്ടെയെന്ന് അദ്ദേഹം ആശംസിച്ചു.
