കുവൈറ്റ് സിറ്റി: രാജ്യത്തെയും മേഖലയിലെയും നിലവിലെ സവിശേഷ സാഹചര്യം കണക്കിലെടുത്ത് വാർത്താ മന്ത്രാലയത്തിന്റെ പ്രവർത്തനസജ്ജത നേരിട്ട് വിലയിരുത്താൻ വാർത്താവിനിമയ-വിവരസാങ്കേതിക സഹമന്ത്രിയും വാർത്താവിതരണ-സാംസ്കാരിക വകുപ്പ് ആക്ടിംഗ് മന്ത്രിയുമായ ഒമർ അൽ ഒമർ വെള്ളിയാഴ്ച മിന്നൽ സന്ദർശനം നടത്തി. ഈദ് അൽ ഫിത്തർ അവധി ദിനങ്ങളിലും മന്ത്രാലയത്തിന്റെ വിവിധ വിഭാഗങ്ങൾ എങ്ങനെയാണ് പ്രവർത്തിക്കുന്നതെന്ന് പരിശോധിക്കാനായിരുന്നു മന്ത്രിയുടെ സന്ദർശനം.
മാധ്യമ പ്രവർത്തനങ്ങൾ തടസ്സമില്ലാതെ തുടരുന്നുവെന്ന് ഉറപ്പാക്കാനാണ് ഈ സന്ദർശനത്തിലൂടെ ലക്ഷ്യമിടുന്നതെന്ന് അദ്ദേഹം വ്യക്തമാക്കി.ഉത്തരവാദിത്തബോധത്തോടെയും ദേശീയ പ്രതിബദ്ധതയോടെയും ജോലി ചെയ്യുന്ന മന്ത്രാലയ ജീവനക്കാരുടെ മികച്ച പ്രകടനത്തെ മന്ത്രി പ്രശംസിച്ചു. പെരുന്നാൾ പോലുള്ള പുണ്യവേളകളിൽ പോലും കുടുംബത്തോടൊപ്പം സമയം ചെലവഴിക്കാതെ രാജ്യസേവനത്തിനായി നിലകൊള്ളുന്ന ജീവനക്കാരുടെ സമർപ്പണത്തെയും ആത്മാർത്ഥതയെയും അദ്ദേഹം അഭിനന്ദിച്ചു.
ജീവനക്കാരുടെ ഇത്തരം പരിശ്രമങ്ങൾ അഭിമാനകരമാണെന്നും രാജ്യത്തിന്റെ മാധ്യമ സുരക്ഷ ഉറപ്പാക്കുന്നതിൽ ഇവരുടെ പങ്ക് നിർണ്ണായകമാണെന്നും അദ്ദേഹം കൂട്ടിച്ചേർത്തു. മേഖലയിൽ നിലനിൽക്കുന്ന പ്രത്യേക സാഹചര്യങ്ങൾക്കിടയിലും മാധ്യമരംഗത്ത് അതീവ ജാഗ്രത പുലർത്തണമെന്ന് അദ്ദേഹം ഉദ്യോഗസ്ഥർക്ക് നിർദ്ദേശം നൽകി. മാധ്യമപ്രവർത്തകർ കാട്ടുന്ന ഈ ആത്മാർത്ഥത വരും തലമുറയ്ക്ക് മാതൃകയാണെന്നും മന്ത്രി സന്ദർശനവേളയിൽ സ്മരിച്ചു.
