കുവൈത്ത് സിറ്റി: കുവൈത്തിലെ ശൈത്യകാലം അതിന്റെ ഏറ്റവും കഠിനമായ ഘട്ടത്തിലേക്ക് കടക്കുകയാണെന്ന് അൽ-ഉജൈരി സയന്റിഫിക് സെന്റർ അറിയിച്ചു. പ്രാദേശികമായി ‘അൽ-അസീറഖ്’ എന്നറിയപ്പെടുന്ന അതിശൈത്യത്തിന്റെ എട്ട് ദിനരാത്രങ്ങൾ ജനുവരി 24 മുതൽ ആരംഭിക്കുമെന്നാണ് പ്രവചനം. ജനുവരി 14 മുതൽ കുവൈറ്റിൽ ‘ശബാത്ത്’ സീസൺ ആരംഭിക്കും. 26 ദിവസം നീണ്ടുനിൽക്കുന്ന ഈ കാലയളവ് ശൈത്യകാലത്തിന്റെ ഉച്ചസ്ഥായിയായി കണക്കാക്കപ്പെടുന്നു. ഈ സമയത്ത് മഞ്ഞു വീഴ്ചയ്ക്കും കഠിനമായ തണുപ്പിനും സാധ്യതയുണ്ട്.ശബാത്ത് സീസണിലെ ഏറ്റവും തണുപ്പേറിയ എട്ട് ദിവസങ്ങളെയാണ് ‘അൽ-അസീറഖ്’ എന്ന് വിളിക്കുന്നത്. വടക്കൻ കാറ്റ് ശക്തമാകുന്നതോടെ താപനില വൻതോതിൽ താഴാൻ ഇത് കാരണമാകും.’അസീറഖ്’ എന്നാൽ നീല നിറം എന്നാണ് അർത്ഥം. ആകാശം കടും നീല നിറത്തിൽ കാണപ്പെടുന്നതും, കഠിനമായ തണുപ്പ് കാരണം ചർമ്മത്തിന് നീല കലർന്ന നിറം വരാൻ സാധ്യതയുള്ളതിനാലുമാണ് ഈ കാലയളവിന് ഈ പേര് ലഭിച്ചത്. ചില രാജ്യങ്ങളിൽ ഇതിനെ ‘ബ്ലൂ കോൾഡ്’ എന്നും വിളിക്കാറുണ്ട്. ശബാത്ത് സീസണിന്റെ പ്രത്യേകതയായി ജനുവരി പകുതിയോടെ രാത്രിയുടെ ദൈർഘ്യം കുറയുകയും പകൽ സമയം ക്രമേണ വർദ്ധിക്കുകയും ചെയ്യും. ഭൂമി വസന്തകാല വിഷുവത്തിലേക്ക് അടുക്കുന്നതിന്റെ സൂചനയാണിത്.
