കുവൈത്ത്സിറ്റി: കുവൈത്തിൽ വെള്ളിയാഴ്ച വൈകുന്നേരം മുതൽ ശനിയാഴ്ച രാവിലെ വരെ പൊടിക്കാറ്റിനും ഒറ്റപ്പെട്ട മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഉപരിതല ഉയർന്ന മർദ്ദാവസ്ഥ ദുർബലമാവുകയും തണുത്ത കാറ്റോടു കൂടിയ കുറഞ്ഞ മർദ്ദാവസ്ഥ രൂപപ്പെടുകയും ചെയ്യുന്നതാണ് കാലാവസ്ഥയിലെ ഈ മാറ്റത്തിന് കാരണം. കാലാവസ്ഥാ വകുപ്പ് ആക്ടിംഗ് ഡയറക്ടർ ദറാർ അൽ-അലി ആണ് ഇത് സംബന്ധിച്ച വിവരങ്ങൾ പങ്കുവെച്ചത്.വെള്ളിയാഴ്ച വൈകുന്നേരത്തോടെ തെക്കുകിഴക്കൻ കാറ്റ് ശക്തമാവുകയും പിന്നീട് അത് വടക്കുപടിഞ്ഞാറൻ ദിശയിലേക്ക് മാറുകയും ചെയ്യും. ഇത് പൊടിക്കാറ്റിന് കാരണമാകും. ശനിയാഴ്ച രാവിലെ വരെ ഈ സാഹചര്യം തുടരാം.കാറ്റിനൊപ്പം രാജ്യത്തിന്റെ വിവിധ ഭാഗങ്ങളിൽ ഒറ്റപ്പെട്ട രീതിയിൽ മഴ പെയ്യാൻ സാധ്യതയുണ്ട്. പകൽ സമയങ്ങളിൽ കാലാവസ്ഥ മിതമായിരിക്കുമെങ്കിലും രാത്രിയിൽ തണുപ്പ് കടുക്കും. മരുഭൂമി മേഖലകളിലും കാർഷിക മേഖലകളിലും അതിശക്തമായ തണുപ്പ് അനുഭവപ്പെടാനും മഞ്ഞ് വീഴ്ചയ്ക്കും സാധ്യതയുണ്ട്.വ്യാഴാഴ്ച കാറ്റിന്റെ വേഗത മണിക്കൂറിൽ 6 മുതൽ 28 കിലോമീറ്റർ വരെയായിരിക്കുമെങ്കിലും വാരാന്ത്യത്തിൽ ഇത് വർദ്ധിക്കാൻ സാധ്യതയുണ്ട്.മരുഭൂമിയിൽ ക്യാമ്പിംഗിന് പോകുന്നവരും ദൂരയാത്ര ചെയ്യുന്നവരും പൊടിക്കാറ്റും തണുപ്പും കണക്കിലെടുത്ത് ജാഗ്രത പാലിക്കണമെന്ന് അധികൃതർ നിർദ്ദേശിച്ചു. ശ്വാസകോശ സംബന്ധമായ അസുഖമുള്ളവർ പൊടിപടലങ്ങളിൽ നിന്ന് സ്വയം സംരക്ഷിക്കാൻ മുൻകരുതലുകൾ എടുക്കേണ്ടതാണ്.
