കുവൈറ്റ്സി റ്റി: രാജ്യത്ത് ലൈസൻസില്ലാതെ സാമ്പത്തിക പ്രവർത്തനങ്ങളിൽ ഏർപ്പെടുന്ന വ്യക്തികൾക്കും സ്ഥാപനങ്ങൾക്കുമെതിരെ ശക്തമായ ജാഗ്രത പുലർത്തണമെന്ന് സെൻട്രൽ ബാങ്ക് ഓഫ് കുവൈറ്റ് പൊതുജനങ്ങളോട് ആവശ്യപ്പെട്ടു. ഇത്തരം നിയമവിരുദ്ധ പ്രവർത്തനങ്ങളെക്കുറിച്ച് വിവരങ്ങൾ ലഭിക്കുന്നവർ അത് അധികൃതരെ അറിയിക്കണമെന്നും ബാങ്ക് നിർദ്ദേശിച്ചതായി റിപ്പോർട്ട് ചെയ്തു. അംഗീകാരമില്ലാത്ത ഇത്തരം ഇടപാടുകൾ വ്യക്തികളുടെ സമ്പാദ്യത്തിന് വലിയ ഭീഷണിയാകുമെന്നും രാജ്യത്തിന്റെ സാമ്പത്തിക സുസ്ഥിരതയെ ദോഷകരമായി ബാധിക്കുമെന്നും ബാങ്ക് മുന്നറിയിപ്പ് നൽകി.
സെൻട്രൽ ബാങ്കിന്റെ ഔദ്യോഗിക ലൈസൻസില്ലാതെ പണമിടപാടുകൾ നടത്തുക, വായ്പകൾ അനുവദിക്കുക, ഇലക്ട്രോണിക് പേയ്മെന്റ് ലിങ്കുകൾ നൽകുക തുടങ്ങിയ പ്രവർത്തനങ്ങളെല്ലാം നിയമവിരുദ്ധമാണെന്ന് ബാങ്ക് പ്രസ്താവനയിൽ വ്യക്തമാക്കി. ഇത്തരം സ്ഥാപനങ്ങളുമായോ വ്യക്തികളുമായോ ഇടപഴകുന്നത് വലിയ സാമ്പത്തിക കെണികൾക്കും തട്ടിപ്പുകൾക്കും കാരണമാകും. ഉപഭോക്താക്കളുടെ പണം സുരക്ഷിതമായിരിക്കാൻ ഔദ്യോഗിക ബാങ്കിംഗ് സംവിധാനങ്ങളെ മാത്രമേ ആശ്രയിക്കാവൂ എന്ന് അധികൃതർ ഓർമ്മിപ്പിച്ചു.
നിയമവിരുദ്ധമായ ഇത്തരം സാമ്പത്തിക ഇടപാടുകളെക്കുറിച്ച് എന്തെങ്കിലും അറിവ് ലഭിക്കുന്നവർ അത് റിപ്പോർട്ട് ചെയ്യാനായി പ്രത്യേക സംവിധാനങ്ങൾ സെൻട്രൽ ബാങ്ക് ഒരുക്കിയിട്ടുണ്ട്. 22972999 എന്ന ഫോൺ നമ്പറിലോ അല്ലെങ്കിൽ ഔദ്യോഗിക ഇമെയിൽ വിലാസം വഴിയോ വിവരങ്ങൾ കൈമാറാവുന്നതാണ്. പൊതുജനങ്ങളുടെ സഹകരണത്തോടെ മാത്രമേ ഇത്തരം സാമ്പത്തിക തട്ടിപ്പുകൾ പൂർണ്ണമായും തടയാൻ സാധിക്കൂ എന്നും ബാങ്ക് വ്യക്തമാക്കി.
