കുവൈറ്റ് സിറ്റി: ഹവല്ലി ഗവർണറേറ്റിലെ കടകളുടെ ലൈസൻസുകളും പരസ്യ പെർമിറ്റുകളും പരിശോധിക്കുന്നതിനായി കുവൈറ്റ് മുനിസിപ്പാലിറ്റി വിപുലമായ ഫീൽഡ് ഇൻസ്പെക്ഷൻ കാമ്പെയ്ൻ ആരംഭിച്ചു. ഓഡിറ്റ് ആൻഡ് മുനിസിപ്പൽ സർവീസസ് മോണിറ്ററിംഗ് ഡിപ്പാർട്ട്മെന്റിന്റെ നേതൃത്വത്തിൽ നടന്ന പരിശോധനയിൽ നിയമലംഘനം നടത്തിയ സ്ഥാപനങ്ങൾക്കെതിരെ കർശന നടപടി സ്വീകരിച്ചു. കാമ്പെയ്നിന്റെ ആദ്യ ഘട്ടത്തിൽ തന്നെ കടകളുടെ പ്രവർത്തനം, പരസ്യങ്ങൾ എന്നിവയുമായി ബന്ധപ്പെട്ട 65 നിയമലംഘനങ്ങൾ കണ്ടെത്തി നടപടിയെടുത്തു.
ഹവല്ലിയിലെ വിവിധ മേഖലകളിൽ പരിശോധന നടത്തിയ ഉദ്യോഗസ്ഥർ, ലൈസൻസില്ലാത്ത പരസ്യ ബോർഡുകൾ നീക്കം ചെയ്യുകയും നിയമലംഘകർക്കെതിരെ നിയമപരമായ നടപടികൾ സ്വീകരിക്കുകയും ചെയ്തു. വരും ആഴ്ചകളിൽ രാജ്യത്തെ എല്ലാ ഗവർണറേറ്റുകളിലും ഈ പരിശോധന തുടരും. പബ്ലിക് റിലേഷൻസ് ഡിപ്പാർട്ട്മെന്റ് തയ്യാറാക്കിയ പ്രത്യേക ഷെഡ്യൂൾ പ്രകാരമായിരിക്കും ഇനിയുള്ള പരിശോധനകൾ. മുനിസിപ്പാലിറ്റി നിയമങ്ങൾ കർശനമായി പാലിക്കുന്നുണ്ടെന്ന് ഉറപ്പാക്കാനാണ് ഈ നീക്കം. വ്യാപാരികൾ തങ്ങളുടെ ലൈസൻസുകളും പരസ്യ പെർമിറ്റുകളും കൃത്യസമയത്ത് പുതുക്കണമെന്നും നിയമലംഘനങ്ങളിൽ നിന്ന് വിട്ടുനിൽക്കണമെന്നും അധികൃതർ ആവശ്യപ്പെട്ടു.
