കുവൈത്ത് സിറ്റി: കുവൈത്തിലെ ആരോഗ്യമേഖലയുടെ വികസനത്തിനും രോഗപ്രതിരോധ പ്രവർത്തനങ്ങൾക്കും മുൻഗണന നൽകിക്കൊണ്ട് രണ്ടാമത് ദാസ്മാൻ അന്താരാഷ്ട്ര പ്രമേഹ സമ്മേളനം ആരംഭിച്ചു. കുവൈത്ത് ഫൗണ്ടേഷൻ ഫോർ ദി അഡ്വാൻസ്മെന്റ് ഓഫ് സയൻസസിന്റെ കീഴിലുള്ള ദാസ്മാൻ ഡയബറ്റിസ് ഇൻസ്റ്റിറ്റ്യൂട്ടാണ് 2026 ജനുവരി 8 മുതൽ 10 വരെ നീണ്ടുനിൽക്കുന്ന ഈ സമ്മേളനം സംഘടിപ്പിക്കുന്നത്.കുവൈത്തിലെ ആരോഗ്യസംവിധാനം ലോകോത്തര നിലവാരത്തിലേക്ക് ഉയർത്തുമെന്നും രോഗപ്രതിരോധ മാർഗ്ഗങ്ങൾക്കും ശാസ്ത്രീയ ഗവേഷണങ്ങൾക്കും മന്ത്രാലയം പൂർണ്ണ പിന്തുണ നൽകുമെന്നും സമ്മേളനം ഉദ്ഘാടനം ചെയ്തുകൊണ്ട് ആരോഗ്യ മന്ത്രി ഡോ. അഹമ്മദ് അൽ-അവാദി പറഞ്ഞു.ചികിത്സാ രംഗത്തെ നൂതന സാങ്കേതിക വിദ്യകളും ആർട്ടിഫിഷ്യൽ ഇന്റലിജൻസും പ്രയോജനപ്പെടുത്തി രോഗികൾക്ക് മികച്ച സേവനം ഉറപ്പാക്കുക എന്നതാണ് മന്ത്രാലയത്തിന്റെ ലക്ഷ്യം. പ്രമേഹരോഗികളിൽ കണ്ടുവരുന്ന ‘ഡയബറ്റിക് ഫൂട്ട്’ പോലുള്ള സങ്കീർണ്ണമായ ആരോഗ്യപ്രശ്നങ്ങൾക്കും അവ തടയാനുള്ള അത്യാധുനിക ചികിത്സാ രീതികൾക്കും സമ്മേളനത്തിൽ പ്രത്യേക പ്രാധാന്യം നൽകുന്നു.ലോകത്തിന്റെ വിവിധ ഭാഗങ്ങളിൽ നിന്നുള്ള വിദഗ്ധരായ ഡോക്ടർമാരും ശാസ്ത്രജ്ഞരും ഈ മൂന്ന് ദിവസത്തെ സമ്മേളനത്തിൽ പങ്കെടുക്കുന്നുണ്ട്. പ്രാദേശിക-അന്തർദേശീയ സ്ഥാപനങ്ങളുമായുള്ള ശാസ്ത്രീയ പങ്കാളിത്തം വർദ്ധിപ്പിക്കുന്നത് കുവൈറ്റിലെ ആരോഗ്യപ്രവർത്തകരുടെ തൊഴിൽ നൈപുണ്യം വർദ്ധിപ്പിക്കാൻ സഹായിക്കും.
