കുവൈത്ത് സിറ്റി: കഴിഞ്ഞ 24 മണിക്കൂറിനിടെ കുവൈത്തിന്റെ വ്യോമപരിധിയിൽ 18 ശത്രു ഡ്രോണുകൾ കണ്ടെത്തിയതായി കുവൈത്ത് സായുധസേന അറിയിച്ചു. ഇതിൽ 13 ഡ്രോണുകൾ തകർത്തതായി പ്രതിരോധ മന്ത്രാലയം വ്യക്തമാക്കി. പ്രതിരോധ മന്ത്രാലയ വക്താവ് കർണൽ സൗദ് അൽ-അത്വാൻ മാധ്യമ ബ്രീഫിംഗിൽ അറിയിച്ചു: രണ്ട് ഡ്രോണുകൾ കുവൈത്ത് നാഷണൽ പെട്രോളിയം കമ്പനിയുടെ രണ്ട് പ്രവർത്തന യൂണിറ്റുകളെ ലക്ഷ്യമിട്ടതിനെ തുടർന്ന് ചെറിയ തീപിടിത്തം ഉണ്ടായെങ്കിലും ആളപായമൊന്നുമില്ല.
മൂന്ന് ഡ്രോണുകൾ ഭീഷണി പരിധിക്ക് പുറത്തേക്ക് വീണതായും അദ്ദേഹം പറഞ്ഞു. അതേസമയം, സൈന്യത്തിന്റെ എഞ്ചിനീയറിംഗ് വിഭാഗത്തിലെ വിസ്ഫോടക വസ്തു നിർവീര്യമാക്കൽ സംഘം കഴിഞ്ഞ 24 മണിക്കൂറിൽ 11 റിപ്പോർട്ടുകൾ കൈകാര്യം ചെയ്തതോടെ, ആക്രമണം ആരംഭിച്ചതിനുശേഷം മൊത്തം 233 റിപ്പോർട്ടുകൾ കൈകാര്യം ചെയ്തതായി അധികൃതർ അറിയിച്ചു.ഇതിനിടെ ആഭ്യന്തര മന്ത്രാലയം കഴിഞ്ഞ 24 മണിക്കൂറിൽ പ്രതിരോധ നടപടികളുടെ ഭാഗമായി വീണ അവശിഷ്ടങ്ങളുമായി ബന്ധപ്പെട്ട 21 സംഭവങ്ങൾ കൈകാര്യം ചെയ്തതായി അറിയിച്ചു.
