കുവൈറ്റ് സിറ്റി: കുവൈറ്റിൽ വരും ദിവസങ്ങളിൽ ആകാശം മേഘാവൃതമായിരിക്കുമെന്നും ഒറ്റപ്പെട്ട മഴയ്ക്കും കാറ്റിനും സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം ഡയറക്ടർ ധരാർ അൽ-അലി അറിയിച്ചു. പകൽ സമയങ്ങളിൽ മിതമായ കാലാവസ്ഥയായിരിക്കുമെങ്കിലും രാത്രിയിൽ തണുപ്പ് കൂടുമെന്നാണ് റിപ്പോർട്ട്. വ്യാഴാഴ്ച വൈകുന്നേരത്തോടെ തന്നെ അന്തരീക്ഷത്തിൽ മാറ്റങ്ങൾ പ്രകടമാകും. വെള്ളിയാഴ്ചയും ശനിയാഴ്ചയും താഴ്ന്ന നിലയിലുള്ള മേഘങ്ങൾ വർദ്ധിക്കാനും ഇടിമിന്നലോടു കൂടിയ ചിതറിപ്പൊഴിയുന്ന മഴയ്ക്കും സാധ്യതയുണ്ട്.
തെക്കുകിഴക്കൻ ദിശയിൽ നിന്നുള്ള കാറ്റ് മണിക്കൂറിൽ 50 കിലോമീറ്റർ വേഗതയിൽ വരെ വീശാൻ സാധ്യതയുണ്ട്. ഇത് പകൽ സമയങ്ങളിൽ പൊടിക്കാറ്റ് ഉയരാൻ കാരണമായേക്കാം. പകൽ സമയത്ത് പരമാവധി താപനില 20 മുതൽ 22 ഡിഗ്രി സെൽഷ്യസ് വരെയായിരിക്കും. കടൽ താരതമ്യേന ശാന്തമായിരിക്കുമെങ്കിലും തിരമാലകൾ 1 മുതൽ 4 അടി വരെ ഉയരാൻ സാധ്യതയുണ്ട്. അറബിക്കടലിൽ നിന്നുള്ള ഈർപ്പമുള്ള വായുപ്രവാഹം എത്തുന്നതാണ് മേഘാവൃതമായ കാലാവസ്ഥയ്ക്കും മഴയ്ക്കും കാരണമാകുന്നത്. യാത്ര ചെയ്യുന്നവർ പൊടിക്കാറ്റും മഴയും കണക്കിലെടുത്ത് ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
