കുവൈത്ത് സിറ്റി: രാജ്യത്തെ നിരവധി സ്കൂളുകളിൽ വിദ്യാര്ത്ഥികളുടെ ഹാജര് നിരക്കിൽ വലിയ കുറവ്. റമദാനിൽ, പ്രത്യേകിച്ച് അവധിക്ക് മുമ്പുള്ള വ്യാഴാഴ്ചകളിൽ വിദ്യാർത്ഥികളുടെ ഹാജരില്ലായ്മയിൽ ശ്രദ്ധേയമായ വർദ്ധനവ് രേഖപ്പെടുത്തിയിട്ടുണ്ട്. മതപരവും ദേശീയവുമായ അവസരങ്ങളിലും മറ്റ് അവധി ദിവസങ്ങളിലും മന്ത്രാലയം അഭിമുഖീകരിക്കുന്ന ഈ ആവർത്തിച്ചുള്ള പ്രവണത റമദാനിൽ കൂടുതൽ പ്രകടമായിരിക്കുകയാണ്. വിശുദ്ധ മാസത്തിൻ്റെ ആദ്യ ദിവസങ്ങളിൽ ഹാജരില്ലായ്മയിൽ ഏറ്റക്കുറച്ചിലുകൾ ഉണ്ടായിരുന്നെങ്കിലും, അത് ക്രമേണ വഷളായി. പല ക്ലാസ് മുറികളും ഏകദേശം ശൂന്യമാകുന്ന അവസ്ഥയുണ്ട്. ചില സ്കൂൾ അഡ്മിനിസ്ട്രേഷനുകൾ ഈ പ്രശ്നം പരിഹരിക്കുന്നതിൽ അയവുള്ള സമീപനം സ്വീകരിക്കുന്നുവെന്നോ അല്ലെങ്കിൽ ഹാജരില്ലായ്മ നിയമങ്ങൾ കർശനമായി നടപ്പിലാക്കുന്നതിൽ പരാജയപ്പെടുന്നുവെന്നോ വിലയിരുത്തലുകൾ വരുന്നുണ്ട്. അതേസമയം, കുടുംബങ്ങളിലെ അച്ചടക്കമില്ലായ്മയാണ് ഇതിൻ്റെ പ്രധാന കാരണമെന്ന് മന്ത്രാലയത്തിലെ മുൻ മനശാസ്ത്ര ഉപദേഷ്ടാവായ ഹുദാ അൽ ഹദ്ദാദ് പറഞ്ഞു. ഹാജരില്ലായ്മ അറിയിപ്പുകൾ ലഭിച്ചതിന് ശേഷം ഈ പ്രവണത തുടരുന്നതിനാല് രക്ഷിതാക്കൾക്ക് ഒഴിഞ്ഞു മാറാനാകില്ലെന്നും അവർ കൂട്ടിച്ചേര്ത്തു.
