കുവൈത്ത് സിറ്റി: ലോകമെമ്പാടുമുള്ള ഹിന്ദി ഭാഷാ പ്രചരണത്തിന്റെ ഭാഗമായി കുവൈത്തിലെ ഇന്ത്യൻ എംബസിയിൽ വിശ്വഹിന്ദി ദിവസ് (ലോക ഹിന്ദി ദിനം) വിപുലമായി ആഘോഷിച്ചു. എംബസി ഓഡിറ്റോറിയത്തിൽ നടന്ന ചടങ്ങിൽ വിദ്യാർത്ഥികളും അധ്യാപകരും ഇന്ത്യൻ സമൂഹത്തിലെ പ്രമുഖരുമടക്കം 350-ലധികം പേർ പങ്കെടുത്തു.കുവൈത്തിലെ 25 ഇന്ത്യൻ സിബിഎസ്ഇ സ്കൂളുകളിൽ നിന്നുള്ള പ്രതിനിധികൾ ചടങ്ങിൽ സജീവമായി പങ്കെടുത്തു. പത്ത് ലക്ഷത്തിലധികം വരുന്ന ഇന്ത്യൻ പ്രവാസികൾ താമസിക്കുന്ന കുവൈത്തിൽ ഹിന്ദി ഭാഷയ്ക്കും ഇന്ത്യൻ സംസ്കാരത്തിനും വർദ്ധിച്ചുവരുന്ന ജനപ്രീതിയെ ആഘോഷങ്ങൾ അടിവരയിട്ടു.ദിനാചരണത്തോടനുബന്ധിച്ച് മൂന്ന് പ്രായപരിധികളിലായി സ്കൂൾ വിദ്യാർത്ഥികൾക്കായി ഹിന്ദി കവിതാലാപന മത്സരങ്ങൾ സംഘടിപ്പിച്ചു. വിജയികളായ വിദ്യാർത്ഥികൾ ചടങ്ങിൽ കവിതകൾ അവതരിപ്പിച്ചു. അധ്യാപകർ തങ്ങൾ രചിച്ച കവിതകളും പരിപാടിയിൽ അവതരിപ്പിച്ചു. പ്രധാനമന്ത്രി നരേന്ദ്ര മോദിയുടെ വിശ്വഹിന്ദി ദിവസ് സന്ദേശം ചടങ്ങിൽ വായിച്ചു. ഹിന്ദി ഭാഷയോടുള്ള താൽപ്പര്യവും അറിവും മുൻനിർത്തി നാല് കുവൈത്ത് പൗരന്മാരെ ചടങ്ങിൽ ആദരിച്ചു. മുബാറക് റാഷിദ് അൽ-അസ്മി (ഗായകൻ), സാദ് ദാഹർ സാദൂൻ അൽ-റഷീദി (മുൻ നാഷണൽ ഗാർഡ് ഓഫീസർ), ഇമാൻ ഹുസൈൻ അലി അൽകൂട്ട് (കുവൈത്ത് ചെസ് ഫെഡറേഷൻ അംഗം), സലാഹ് എ എം ഖലഫ് (വ്യവസായി) എന്നിവരാണ് ആദരിക്കപ്പെട്ടത്. വിദ്യാർത്ഥികളുടെയും അധ്യാപകരുടെയും ആവേശകരമായ പങ്കാളിത്തത്തെ ഇന്ത്യൻ അംബാസഡർ പാരമിത ത്രിപാഠി അഭിനന്ദിച്ചു. മത്സരവിജയികൾക്കുള്ള പുരസ്കാരങ്ങൾ അവർ വിതരണം ചെയ്തു. ഹിന്ദി ഭാഷയുടെ സാംസ്കാരികവും ചരിത്രപരവുമായ പ്രാധാന്യത്തെക്കുറിച്ച് അവബോധം വളർത്തുന്നതിനാണ് എല്ലാ വർഷവും ജനുവരി 10 ലോക ഹിന്ദി ദിനമായി ആചരിക്കുന്നത്. ആഗോളതലത്തിൽ ദശലക്ഷക്കണക്കിന് ആളുകൾ സംസാരിക്കുന്ന ഹിന്ദിക്ക് അന്താരാഷ്ട്ര തലത്തിൽ വലിയ സ്ഥാനമാണുള്ളതെന്ന് അംബാസഡർ ഓർമ്മിപ്പിച്ചു.
