കുവൈത്ത് സിറ്റി: യുദ്ധക്കെടുതി അനുഭവിക്കുന്ന സുഡാനിലെ ആരോഗ്യമേഖലയെ സഹായിക്കുന്നതിനായി കുവൈത്ത് പേഷ്യന്റ്സ് റിലീഫ് ഫണ്ട് സൊസൈറ്റിയുടെ നേതൃത്വത്തിൽ പ്രത്യേക ശസ്ത്രക്രിയാ ക്യാമ്പ് ആരംഭിച്ചു. തിങ്കളാഴ്ച സുഡാനിലെ ഖാർത്തൂം, കസാല എന്നീ സംസ്ഥാനങ്ങളിലാണ് ഈ പദ്ധതിക്ക് തുടക്കമിട്ടത്. ഏകദേശം 250 ശസ്ത്രക്രിയകൾ ഈ ക്യാമ്പിലൂടെ സൗജന്യമായി നിർവ്വഹിക്കാനാണ് ലക്ഷ്യമിടുന്നത്. പീഡിയാട്രിക് സർജറി (കുട്ടികൾക്കായുള്ള ശസ്ത്രക്രിയകൾ), യൂറോളജി (വൃക്ക, മൂത്രാശയ സംബന്ധമായ രോഗങ്ങൾ), ഗ്യാസ്ട്രോഇന്റസ്റ്റൈനൽ എൻഡോസ്കോപ്പി (ദഹനേന്ദ്രിയ സംബന്ധമായ പരിശോധനകളും ചികിത്സയും) എന്നീ ശസ്ത്രക്രിയകളാണ് പ്രധാനമായും നടത്തുക.ഖത്തറിലെ സുഡാനി ഡോക്ടേഴ്സ് അസോസിയേഷനുമായി സഹകരിച്ചാണ് കുവൈറ്റ് ഈ പദ്ധതി നടപ്പിലാക്കുന്നത്. ഖത്തറിൽ നിന്നുള്ള പ്രമുഖ പീഡിയാട്രിക് യൂറോളജി കൺസൾട്ടന്റ് ഡോ. താരിഖ് ഉസ്മാന്റെ നേതൃത്വത്തിലുള്ള വിദഗ്ധ സംഘം ഈ ക്യാമ്പിൽ പങ്കെടുക്കുന്നുണ്ട്. സുഡാനിലെ ജീവൻരക്ഷാ ആരോഗ്യ സേവനങ്ങളെ പിന്തുണയ്ക്കുന്നതിൽ കുവൈത്ത് സൊസൈറ്റി വഹിക്കുന്ന വലിയ പങ്കിനെ സുഡാൻ ആരോഗ്യ മന്ത്രാലയം അണ്ടർസെക്രട്ടറി അബ്ദുൽ മജീദ് ഫദ്ലല്ല പ്രശംസിച്ചു. ദുഷ്കരമായ സാഹചര്യത്തിൽ കുവൈത്ത് നൽകുന്ന ഈ സഹായം മറക്കാനാവില്ലെന്ന് അദ്ദേഹം കൂട്ടിച്ചേർത്തു.
