ഒസാക്ക/കുവൈറ്റ് സിറ്റി: ജപ്പാനിലെ ഒസാക്കയിൽ നടന്ന രാജ്യാന്തര എക്സ്പോയിൽ കുവൈറ്റ് അവതരിപ്പിച്ച ‘ബീക്കൺ ഓഫ് വിഷൻ’ എന്ന പവിലിയന് ആഗോള അംഗീകാരം. ബ്രാൻഡ്എക്സ് 2026 അവാർഡുകളിൽ ഏറ്റവും മികച്ച വാസ്തുവിദ്യാ പ്രദർശനത്തിനുള്ള വെള്ളി പുരസ്കാരമാണ് കുവൈറ്റ് സ്വന്തമാക്കിയത്. കുവൈറ്റ് വാർത്താ ഏജൻസിയായ കുനയോട് സംസാരിക്കവെ മന്ത്രാലയത്തിലെ സപ്പോർട്ട് സർവീസസ് അസിസ്റ്റന്റ് അണ്ടർസെക്രട്ടറി സേലം അൽ വതിയാൻ ആണ് ഈ അഭിമാനകരമായ നേട്ടം അറിയിച്ചത്.കുവൈറ്റിന്റെ സാംസ്കാരികവും മാധ്യമപരവുമായ സന്ദേശത്തിന്റെ ആഴം വ്യക്തമാക്കുന്നതാണ് ഈ നേട്ടമെന്ന് അദ്ദേഹം പറഞ്ഞു. രാജ്യത്തിന്റെ രാഷ്ട്രീയ നേതൃത്വത്തിൽ നിന്നുള്ള നിരന്തരമായ പിന്തുണയുടെയും വിവര സാങ്കേതിക മന്ത്രാലയം നടപ്പിലാക്കുന്ന തന്ത്രപ്രധാനമായ പ്രവർത്തനങ്ങളുടെയും ഫലമാണ് ഈ പുരസ്കാരം. പ്രധാന അന്താരാഷ്ട്ര വേദികളിൽ കുവൈറ്റിന്റെ സാന്നിധ്യം ഉറപ്പിക്കാനും രാജ്യത്തെക്കുറിച്ച് പോസിറ്റീവായ ഒരു ചിത്രം ആഗോളതലത്തിൽ കെട്ടിപ്പടുക്കാനും ഇത്തരം പങ്കാളിത്തങ്ങൾ സഹായിക്കുന്നു. സാംസ്കാരിക നയതന്ത്രത്തിന്റെ ഭാഗമായി സോഫ്റ്റ് പവർ ഉപയോഗപ്പെടുത്തിക്കൊണ്ടുള്ള കുവൈറ്റിന്റെ മുന്നേറ്റത്തിലെ ഒരു സുപ്രധാന നാഴികക്കല്ലായാണ് ഈ രാജ്യാന്തര നേട്ടം വിലയിരുത്തപ്പെടുന്നത്.
