കുവൈറ്റ് സിറ്റി: ഷുവൈഖ് ഇൻഡസ്ട്രിയൽ ഏരിയയിൽ പ്രവർത്തിച്ചിരുന്ന ലൈസൻസില്ലാത്ത മരുന്ന് ഗോഡൗൺ വാണിജ്യ വ്യവസായ മന്ത്രാലയവും ആരോഗ്യ മന്ത്രാലയവും ചേർന്ന് നടത്തിയ സംയുക്ത പരിശോധനയിൽ അടച്ചുപൂട്ടി. പൊതുജനാരോഗ്യം സംരക്ഷിക്കുന്നതിനും വ്യാജ ഉൽപ്പന്നങ്ങൾ വിപണിയിലെത്തുന്നത് തടയുന്നതിനും വേണ്ടിയാണ് ബുധനാഴ്ച ഉദ്യോഗസ്ഥർ ഈ അടിയന്തര നടപടി സ്വീകരിച്ചത്. മതിയായ സുരക്ഷാ മാനദണ്ഡങ്ങൾ പാലിക്കാതെ പ്രവർത്തിച്ച ഈ സ്ഥാപനം പൂട്ടാൻ അധികൃതർ ഉടൻ ഉത്തരവിടുകയായിരുന്നു.
ആവശ്യമായ ലൈസൻസുകൾ ഇല്ലാതെയും ആരോഗ്യ മന്ത്രാലയം അംഗീകരിച്ച നിയമങ്ങൾ ലംഘിച്ചുമാണ് ഈ ഗോഡൗണിൽ വൻതോതിൽ മരുന്നുകളും ലായനികളും മറ്റ് മെഡിക്കൽ സാമഗ്രികളും സൂക്ഷിച്ചിരുന്നതെന്ന് പ്രസ്താവനയിൽ മന്ത്രാലയം വ്യക്തമാക്കി. അംഗീകൃത മാനദണ്ഡങ്ങൾ പാലിക്കാത്ത രീതിയിലുള്ള സ്റ്റോറേജും സാങ്കേതികമായ നിയമലംഘനങ്ങളും പരിശോധനയിൽ ഉദ്യോഗസ്ഥർ കണ്ടെത്തിയിട്ടുണ്ട്. മരുന്നുകൾ സൂക്ഷിക്കേണ്ട ശാസ്ത്രീയമായ രീതികൾ ഇവിടെ ഒരിടത്തും അവലംബിച്ചിരുന്നില്ല.
ഫീൽഡ് പരിശോധനയ്ക്ക് ശേഷം ഉദ്യോഗസ്ഥർ നിയമലംഘന റിപ്പോർട്ട് തയ്യാറാക്കുകയും തുടർനടപടികൾക്കായി ആരോഗ്യ മന്ത്രാലയവുമായി ഏകോപനം നടത്തുകയും ചെയ്തു. നിയമവിരുദ്ധമായ ഉൽപ്പന്നങ്ങൾ വിപണിയിൽ വിതരണം ചെയ്യുന്നത് തടയുന്നതിലൂടെ പൊതുജനസുരക്ഷ ഉറപ്പാക്കുകയാണ് ലക്ഷ്യമെന്ന് അധികൃതർ അറിയിച്ചു. ഉപഭോക്താക്കളുടെ സംരക്ഷണത്തിനും പൊതുജനാരോഗ്യം നിലനിർത്തുന്നതിനും വേണ്ടി സ്ഥാപനങ്ങൾ നിയമങ്ങൾ പാലിക്കുന്നുണ്ടെന്ന് ഉറപ്പുവരുത്താൻ വരുംദിവസങ്ങളിലും കർശനമായ പരിശോധനകൾ തുടരുമെന്ന് മന്ത്രാലയം വ്യക്തമാക്കി.
