കുവൈറ്റ് സിറ്റി: രാജ്യത്തിന്റെ സുരക്ഷാ സജ്ജീകരണങ്ങൾ വർദ്ധിപ്പിക്കുന്നതിന്റെ ഭാഗമായി കുവൈറ്റ് ആഭ്യന്തര മന്ത്രാലയം സമുദ്രമേഖലയിൽ തത്സമയ വെടിവെപ്പ് പരിശീലനം നടത്തുന്നു. ഔവാ ദ്വീപിനും കുബ്ബർ ദ്വീപിനും ഇടയിലുള്ള ‘ബ്രാവോ’ എന്ന് പേരിട്ടിരിക്കുന്ന സമുദ്ര മേഖലയിലാണ് 2026 ഫെബ്രുവരി 15 മുതൽ 17 വരെ മൂന്ന് ദിവസങ്ങളിലായി ഈ അഭ്യാസം നടക്കുന്നത്. പോലീസിന്റെ ഏവിയേഷൻ വിംഗിന്റെ നേതൃത്വത്തിൽ നടക്കുന്ന ഈ പരിശീലനം പ്രതിദിനം രാവിലെ 9 മണി മുതൽ ഉച്ചയ്ക്ക് 12 മണി വരെയായിരിക്കും. 3,000 അടി ഉയരത്തിൽ വെച്ചാണ് വെടിവെപ്പ് അഭ്യാസം നിശ്ചയിച്ചിരിക്കുന്നത്.സൈനിക ഉദ്യോഗസ്ഥരുടെയും വ്യോമസേനയുടെയും പ്രവർത്തനക്ഷമത വർദ്ധിപ്പിക്കാനും ഏറ്റവും ഉയർന്ന സുരക്ഷാ മാനദണ്ഡങ്ങൾ പാലിച്ച് ദൗത്യങ്ങൾ പൂർത്തിയാക്കാനുള്ള ശേഷി കൈവരിക്കാനുമാണ് ഇത്തരമൊരു പരിശീലന പരിപാടിയിലൂടെ ലക്ഷ്യമിടുന്നത്.
അംഗീകൃത പരിശീലന പദ്ധതികളുടെ ഭാഗമായാണ് ഈ നടപടിയെന്ന് ആഭ്യന്തര മന്ത്രാലയം ഔദ്യോഗിക പ്രസ്താവനയിലൂടെ വ്യക്തമാക്കി. നിർദ്ദിഷ്ട അഭ്യാസ മേഖലയുടെ കൃത്യമായ കോർഡിനേറ്റുകളും മന്ത്രാലയം പുറത്തുവിട്ടിട്ടുണ്ട്. പരിശീലനം നടക്കുന്ന സാഹചര്യത്തിൽ സമുദ്രയാത്രികർ, മത്സ്യത്തൊഴിലാളികൾ, ബോട്ട് ഉടമകൾ എന്നിവർ അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. നിശ്ചയിച്ചിട്ടുള്ള സമയക്രമങ്ങളിൽ ഈ മേഖലയിലേക്ക് പ്രവേശിക്കുന്നത് ഒഴിവാക്കണമെന്നും പൊതുസുരക്ഷ ഉറപ്പാക്കുന്നതിനായി മന്ത്രാലയം നൽകുന്ന നിർദ്ദേശങ്ങൾ കർശനമായി പാലിക്കണമെന്നും റിപ്പോർട്ടിൽ പറയുന്നു.
