കുവൈത്ത് സിറ്റി: പരിസ്ഥിതി സംരക്ഷണ നിയമം നമ്പർ 42/2014 ലംഘിക്കുന്നതിൻ്റെ അപകടങ്ങളെക്കുറിച്ച് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ, ലൈസൻസുള്ള എയർ ഓപ്പറേറ്റർമാർക്ക് മുന്നറിയിപ്പ് നൽകി. വിമാന യാത്രയിൽ പുകവലി നിരോധനം സംബന്ധിച്ച ഭേദഗതികളിൽ പിഴ 200,000 കുവൈത്തി ദിനാർ വരെ എത്തുമെന്നും അധികൃതർ പറഞ്ഞു. ഫ്ലൈറ്റുകളിൽ വിമാന ജീവനക്കാരും യാത്രക്കാരും ഉൾപ്പെടുന്ന പുകവലി സംഭവങ്ങളുടെ ഒന്നിലധികം റിപ്പോർട്ടുകൾ ലഭിച്ചതിനെത്തുടർന്ന് ഡിജിസിഎ എയർ ഓപ്പറേറ്റർമാർക്ക് പരിസ്ഥിതി സംരക്ഷണ നിയമത്തെക്കുറിച്ച് മുന്നറിയിപ്പ് നൽകുകയായിരുന്നു. പുകവലി നിരോധന നിയമം ലംഘിക്കുന്നവർക്ക് 50,000 മുതൽ 200,000 കുവൈത്തി ദിനാർ വരെ പിഴ ചുമത്തുകയും കർശനമായ നിയമപരമായ നടപടികൾ സ്വീകരിക്കുകയും ചെയ്യും. വിമാനയാത്രയ്ക്കിടെ പുകവലിയിൽ നിന്ന് വിട്ടുനിൽക്കാൻ ക്രൂ അംഗങ്ങൾക്ക് നിർദ്ദേശം നൽകുകയും നിയമത്തെക്കുറിച്ച് യാത്രക്കാരെ അറിയിക്കുകയും ചെയ്യുന്നത് ഉൾപ്പെടെയുള്ള കർശനമായ നടപടികൾ സ്വീകരിക്കണമെന്ന് ഡിജിസിഎ എയർ ഓപ്പറേറ്റർമാരോട് അഭ്യർത്ഥിച്ചു.
