നാളെ സംഭവിക്കുന്ന സൂര്യഗ്രഹണം (Annular Solar Eclipse) കുവൈറ്റിൽ ദൃശ്യമാകില്ലെന്ന് കുവൈത്ത് ജ്യോതിശാസ്ത്ര കേന്ദ്രമായ അൽ-ഒജൈരി സയന്റിഫിക് സെന്റർ അറിയിച്ചു. ഈ ഗ്രഹണത്തിന്റെ പ്രധാന സവിശേഷതയായ “റിംഗ് ഓഫ് ഫയർ” (Ring of Fire) എന്ന പ്രതിഭാസം കാണപ്പെടുക ദക്ഷിണ ധ്രുവം, ദക്ഷിണാഫ്രിക്ക, ചിലി തുടങ്ങിയ പ്രദേശങ്ങളിലായിരിക്കുമെന്നും അധികൃതർ വ്യക്തമാക്കി. ചന്ദ്രൻ സൂര്യനെ പൂർണമായി മൂടാതെ, സൂര്യന്റെ അരികുകൾ പ്രകാശവളയമായി കാണപ്പെടുന്നതാണ് ഈ ഗ്രഹണത്തിന്റെ പ്രത്യേകത.
അതേസമയം, മാർച്ച് 3-ന് ഉണ്ടാകുന്ന പൂർണ ചന്ദ്രഗ്രഹണവും കുവൈറ്റിൽ കാണാനാകില്ലെന്ന് അൽ-ഒജൈരി അറിയിച്ചു. ഈ സമയത്ത് ചന്ദ്രൻ ഇരുണ്ട ചുവപ്പ് നിറത്തിലേക്ക് മാറുന്ന പ്രതിഭാസം സാധാരണയായി കാണപ്പെടുന്നതാണെന്നും വിശദീകരിച്ചു. ജ്യോതിശാസ്ത്ര സംഭവങ്ങൾ ശാസ്ത്രീയ പ്രാധാന്യമുള്ളവയാണെന്നും, ഗ്രഹണങ്ങൾ നിരീക്ഷിക്കുമ്പോൾ സുരക്ഷാ മാർഗങ്ങൾ പാലിക്കണമെന്നും വിദഗ്ധർ ഓർമ്മിപ്പിച്ചു.
