കുവൈത്ത് സിറ്റി: കുവൈത്തിലെ പ്രധാന പാതകളിലൊന്നായ അൽ-തആവുൻ സ്ട്രീറ്റിൽ റോഡ് അറ്റകുറ്റപ്പണികൾ ആരംഭിച്ചതിനെത്തുടർന്ന് ഗതാഗത നിയന്ത്രണം ഏർപ്പെടുത്തിയതായി ജനറൽ ട്രാഫിക് ഡിപ്പാർട്ട്മെന്റ് അറിയിച്ചു. ജാസിം അൽ-ഖറാഫി റോഡ് (സിക്സ്ത് റിംഗ് റോഡ്), കിംഗ് അബ്ദുൽ അസീസ് ബിൻ അബ്ദുറഹ്മാൻ അൽ സൗദ് റോഡ് (ഫഹാഹീൽ റോഡ്) എന്നിവിടങ്ങളിൽ നിന്ന് അൽ-ബിദ റൗണ്ട് എബൗട്ട് ലക്ഷ്യമാക്കി വരുന്ന വാഹനങ്ങൾക്കാണ് ഈ നിയന്ത്രണം ബാധകമാകുന്നത്. പാതയിലെ ഒന്നര വരികളാണ് പണികൾക്കായി അടച്ചിരിക്കുന്നത്.അലി തുനയ്യാൻ അൽ-ഉതൈന സ്ട്രീറ്റിലെ ഇന്റർസെക്ഷൻ മുതൽ അൽ-ബിദ റൗണ്ട് എബൗട്ട് വരെയുള്ള ഭാഗത്താണ് നിയന്ത്രണം. ജനുവരി 6, ചൊവ്വാഴ്ച മുതൽ ആരംഭിച്ച ഈ നിയന്ത്രണം അറ്റകുറ്റപ്പണികൾ പൂർത്തിയാകുന്നത് വരെ തുടരും.യാത്രക്കാർ വേഗത കുറയ്ക്കണമെന്നും ട്രാഫിക് ഡൈവേർഷനുകൾ കൃത്യമായി പാലിക്കണമെന്നും അധികൃതർ നിർദ്ദേശിച്ചു. തിരക്ക് ഒഴിവാക്കുന്നതിനും സുഗമമായ ഗതാഗതം ഉറപ്പാക്കുന്നതിനും ട്രാഫിക് പോലീസ് ഉദ്യോഗസ്ഥരുമായി സഹകരിക്കണമെന്ന് വകുപ്പ് അഭ്യർത്ഥിച്ചു. അറ്റകുറ്റപ്പണികൾ നടക്കുന്നതിനാൽ ഈ ഭാഗത്ത് ഗതാഗതക്കുരുക്കിന് സാധ്യതയുള്ളതിനാൽ യാത്രക്കാർ മുൻകൂട്ടി സമയം ക്രമീകരിക്കേണ്ടതാണ്.
