കുവൈറ്റ് സിറ്റി: കുവൈറ്റിലൂടെ കടന്നുപോകുന്ന അപൂർവ്വ ദേശാടന പക്ഷികളെ കണ്ടെത്തുന്നതിനും അവയെ നിരീക്ഷിക്കുന്നതിനുമായി ആർട്ടിഫിഷ്യൽ ഇന്റലിജൻസ് അധിഷ്ഠിത സാങ്കേതികവിദ്യയുമായി കുവൈറ്റ് ഇൻസ്റ്റിറ്റ്യൂട്ട് ഫോർ സയന്റിഫിക് റിസർച്ച്. ഇൻസ്റ്റിറ്റ്യൂട്ടിലെ അക്കാദമിക് ഗവേഷകയായ ഡോ. സാറ അൽ-ദോസരിയാണ് പക്ഷികളുടെ ശബ്ദരേഖകൾ ഉപയോഗിച്ചുള്ള ഈ നൂതന പഠനരീതിയെക്കുറിച്ച് വെളിപ്പെടുത്തിയത്.
ഓരോ പക്ഷിയുടെയും തനിമയാർന്ന ശബ്ദങ്ങൾ തിരിച്ചറിയാൻ സാധിക്കുന്ന പ്രോഗ്രാമുകൾ വികസിപ്പിച്ചെടുക്കുകയും, അവ ആർട്ടിഫിഷ്യൽ ഇന്റലിജൻസ് സംവിധാനങ്ങളിലേക്ക് ഉൾപ്പെടുത്തുകയും ചെയ്തിട്ടുണ്ട്. വസന്തകാലത്തും ശരത്കാലത്തും കുവൈറ്റിലെത്തുന്ന പക്ഷികളുടെ സാന്നിധ്യം ഈ ‘സൗണ്ട് ഫയലുകൾ’ വഴി എളുപ്പത്തിൽ സ്ഥിരീകരിക്കാൻ സാധിക്കും. നിലവിൽ ഈ പദ്ധതി ഗവേഷണ ഘട്ടത്തിലാണ്. അപൂർവ്വമായ പക്ഷി ഇനങ്ങളെ തിരിച്ചറിഞ്ഞാൽ ഉടൻ തന്നെ അവയുടെ വിവരങ്ങൾ ഔദ്യോഗികമായി പുറത്തുവിടുമെന്ന് ഡോ. സാറ വ്യക്തമാക്കി.
കബ്ദ് റിസർവിലെ പക്ഷി സമൂഹങ്ങളെക്കുറിച്ച് പുതിയ ഗവേഷണം ആരംഭിച്ചിട്ടുണ്ടെന്നും, ശബ്ദ ഉപകരണങ്ങളും കൃത്രിമബുദ്ധി പ്രോഗ്രാമുകളും ഉപയോഗിച്ച് പക്ഷി വൈവിധ്യത്തിൽ റിസർവ് മാനേജ്മെന്റ് രീതികളുടെ സ്വാധീനത്തെക്കുറിച്ചുള്ള ഒരു പഠനവും ആരംഭിച്ചിട്ടുണ്ടെന്നും അവർ സൂചിപ്പിച്ചു, പഠനത്തിനായുള്ള പ്രാരംഭ ഡാറ്റ പരമാവധി രണ്ട് മാസത്തിനുള്ളിൽ തയ്യാറാക്കുമെന്ന് സൂചിപ്പിക്കുന്നു.പരമ്പരാഗതമായി പക്ഷികളെ നേരിട്ട് കണ്ട് തിരിച്ചറിയുന്ന രീതിക്ക് പകരം, അവയുടെ ശബ്ദങ്ങളിലൂടെ പക്ഷിവൈവിധ്യം അളക്കുന്നത് കുവൈറ്റിലെ പരിസ്ഥിതി ഗവേഷണ രംഗത്ത് വലിയ മാറ്റങ്ങൾ കൊണ്ടുവരുമെന്നാണ് കരുതപ്പെടുന്നത്.
