കുവൈറ്റ് സിറ്റി: ജിസിസി രാജ്യങ്ങളുടെ സാമ്പത്തിക പ്രവർത്തനങ്ങളുടെ ഏകീകൃത വർഗ്ഗീകരണ ഗൈഡിന്റെ പരിധിയിൽ ഉൾപ്പെടുത്തിക്കൊണ്ട് വാണിജ്യ വ്യവസായ മന്ത്രാലയം 2026-ലെ പുതിയ മന്ത്രാലയ പ്രമേയം (നമ്പർ 167) പുറപ്പെടുവിച്ചു. ഇലക്ട്രിക് വാഹനങ്ങളുടെ വിപണിയുമായി ബന്ധപ്പെട്ട രണ്ട് പുതിയ വാണിജ്യ പ്രവർത്തനങ്ങൾക്കാണ് ഈ പുതിയ തീരുമാനത്തിലൂടെ മന്ത്രാലയം ഔദ്യോഗിക അനുമതി നൽകിയത്.ഇലക്ട്രിക് വാഹന ചാർജിങ് സ്റ്റേഷനുകളുടെ നടത്തിപ്പും മേൽനോട്ടവുമാണ് ആദ്യത്തെ വാണിജ്യ പ്രവർത്തനം. രണ്ടാമത്തേത് ഇലക്ട്രിക് വാഹന ചാർജിങ് ഉപകരണങ്ങളുടെ വിൽപ്പന, ഇൻസ്റ്റലേഷൻ, അറ്റകുറ്റപ്പണികൾ, അനുബന്ധ സേവനങ്ങൾ എന്നിവയാണ്.ഈ രണ്ട് വാണിജ്യ മേഖലകൾക്കുമുള്ള നിയന്ത്രണ ഏജൻസികളെയും മന്ത്രാലയം കൃത്യമായി നിർണ്ണയിച്ചിട്ടുണ്ട്.
ചാർജിങ് സ്റ്റേഷനുകളുടെ നടത്തിപ്പും മാനേജ്മെന്റും വൈദ്യുതി, ജല, പുനരുപയോഗ ഊർജ്ജ മന്ത്രാലയം, ജനറൽ ട്രാഫിക് ഡിപ്പാർട്ട്മെന്റ് ഉൾപ്പെടെയുള്ള ആഭ്യന്തര മന്ത്രാലയത്തിന്റെ ട്രാഫിക് എൻജിനീയറിങ് ഡിപ്പാർട്ട്മെന്റ് എന്നിവയുടെ മേൽനോട്ടത്തിന് വിധേയമായിരിക്കും. എന്നാൽ ചാർജിങ് ഉപകരണങ്ങളുടെ വിൽപ്പന, ഇൻസ്റ്റലേഷൻ, അറ്റകുറ്റപ്പണി എന്നിവയുടെ ചുമതല വൈദ്യുതി, ജല, പുനരുപയോഗ ഊർജ്ജ മന്ത്രാലയത്തിന്റെ മാത്രം നിയന്ത്രണത്തിലായിരിക്കും.
