ആപ്പിളിന്‍റെ ആദ്യത്തെ മടക്കാവുന്ന ഫോണായ ഐഫോൺ ഡുവോ വിപണിയിലെത്തിയ ഉടൻ തന്നെ ഉപയോക്താക്കളിൽ നിന്ന് പരാതികളുയർന്നിരുന്നു. ഗുരുതരമായ ഹാർഡ്‌വെയർ പ്രശ്‌നങ്ങളാണ് റിപ്പോർട്ട് ചെയ്‌തത്. ഫോൺ ഉപയോഗിച്ച് തുടങ്ങിയതിന് ശേഷം ദിവസങ്ങൾക്കുള്ളിലോ, മണിക്കൂറുകൾക്കുള്ളിലോ തന്നെ ഡിസ്‌പ്ലേയ്ക്ക് കേടുപാടുകൾ സംഭവിച്ചതായാണ് പരാതി. സംഭവത്തിൽ ആപ്പിൾ പിഴവ് സമ്മതിച്ചതായാണ് റിപ്പോർട്ടുകൾ.
തകരാറുകൾ കണ്ടെത്തിയ ഐഫോൺ ഡ്യുവോ കൈവശമുള്ള ഉപയോക്താക്കൾ ആപ്പിൾ ഉപകരണങ്ങൾക്ക് വാറന്‍റിയും സാങ്കേതിക പിന്തുണയും നൽകുന്ന ‘ആപ്പിൾ കെയർ’ വഴി ബന്ധപ്പെട്ട് ഫോൺ മാറ്റിവാങ്ങണമെന്ന് ആപ്പിൾ നിർദ്ദേശിച്ചു.
കഴിഞ്ഞ സെപ്‌റ്റംബർ 9നാണ് ബുക്ക് സ്റ്റൈലിൽ രണ്ടായി മടക്കാവുന്ന ഫോൾഡബിൾ ഫോണായ ഐഫോൺ ഡുവോ ഇന്ത്യയുൾപ്പെടെയുള്ള വിപണിയിൽ പുറത്തിറക്കിയത്. ഒക്‌ടോബർ 23നാണ് ഇതിന്‍റെ വിൽപ്പന ആരംഭിച്ചത്. ഇതിന് മണിക്കൂറുകൾക്കുള്ളിൽ തന്നെ ഡിസ്‌പ്ലേയ്ക്ക് പൊട്ടൽ സംഭവിച്ചതായി ഉപയോക്താക്കളിൽ നിന്ന് പരാതി ഉയർന്നിരുന്നു. സ്‌ക്രീൻ മടക്കിവെക്കുന്ന ഭാഗമായ ഹിഞ്ചിന് മുകളിലായി നെടുകെയുള്ള വരയും, അതിന്‍റെ വലതുഭാഗത്തേക്ക് നീളുന്ന ഇടത്ത് തിരശ്ചീനരേഖയും പ്രത്യക്ഷപ്പെടുന്നതായാണ് ഉപയോക്താക്കൾ പറയുന്നത്.
പുതിയ ഡിസ്‌പ്ലേയെ പിന്തുണയ്ക്കുന്ന ആപ്പുകളുടെ കുറവിനെക്കുറിച്ച് റിവ്യൂ ചെയ്യുന്നവർ പരാതിപ്പെട്ടിരുന്നു. എന്നാൽ ഇപ്പോൾ റിപ്പോർട്ട് ചെയ്യപ്പെടുന്ന ഡിസ്‌പ്ലേയിലെ പ്രശ്‌നം ഗുരുതരമായ ഹാർഡ്‌വെയർ പ്രശ്‌നമായി കണക്കാക്കുന്നു. ഈ ഫോൾഡബിൾ ഫോണിന് 2.99 ലക്ഷം രൂപ മുതലാണ് ഇന്ത്യൻ വിപണിയിൽ വില ആരംഭിക്കുന്നത്. ആപ്പിളിന്‍റെ ഇതുവരെയുള്ളതിൽ വെച്ച് ഏറ്റവും ചെലവേറിയ ഈ ഐഫോണാണ് ഇത്.
