കുവൈത്ത് സിറ്റി, ഓഗസ്റ്റ് 20: കുവൈത്തിൽ സന്ദർശക വിസകൾക്കും രാജ്യത്തിന് പുറത്തുള്ള പ്രവാസികളുടെ അവധി കാലാവധിക്കും നൽകിയിരുന്ന അസാധാരണ ഇളവുകൾ അവസാനിപ്പിക്കുന്നതായി ആഭ്യന്തര മന്ത്രാലയം അറിയിച്ചു. 2026 സെപ്റ്റംബർ 1 മുതൽ സാധാരണ നിയമങ്ങളും കാലാവധികളും വീണ്ടും പ്രാബല്യത്തിൽ വരും.
നിലവിൽ കുവൈത്തിലുള്ളവരുടെ എല്ലാ തരത്തിലുള്ള എൻട്രി, വിസിറ്റ് വിസകളുടെയും ഓട്ടോമാറ്റിക് എക്സ്റ്റൻഷൻ സെപ്റ്റംബർ 1 ന് അവസാനിക്കും. തുടർന്ന് ഓരോ വിസയ്ക്കും നിയമപ്രകാരം അനുവദിച്ചിരിക്കുന്ന കാലാവധിയും നടപടിക്രമങ്ങളും ബാധകമായിരിക്കും.
അതേസമയം, നിലവിൽ കുവൈത്തിന് പുറത്തുള്ള പ്രവാസികളുടെ ലീവ് പെർമിറ്റുകളുടെ നിയമപരമായ കാലാവധി കണക്കാക്കുന്നതും സെപ്റ്റംബർ 1 മുതൽ പുനരാരംഭിക്കും.
ഓഗസ്റ്റ് 31-നോ അതിന് മുമ്പോ കുവൈത്തിൽ നിന്ന് പുറത്തുപോയ പ്രവാസികൾക്ക്, നിലവിലുള്ള ചട്ടങ്ങൾ അനുസരിച്ച് അനുവദിച്ചിട്ടുള്ള അധിക അസാധാരണ കാലയളവ് തുടരുമെന്നും മന്ത്രാലയം വ്യക്തമാക്കി.
പ്രവാസിയുടെ ലീവ് പെർമിറ്റ് കാലാവധി അവസാനിക്കുന്ന തീയതി നിർണയിക്കുന്നതിനുള്ള ഔദ്യോഗിക രേഖ Sahel ആപ്പിലൂടെ ലഭിക്കുന്ന Residency Permit Certificate ആയിരിക്കും. അതിനാൽ കുവൈത്തിലേക്ക് മടങ്ങുന്നവർ സർട്ടിഫിക്കറ്റിൽ രേഖപ്പെടുത്തിയിരിക്കുന്ന കാലാവധി പ്രത്യേകം പരിശോധിച്ച് അതിനുള്ളിൽ രാജ്യത്ത് തിരിച്ചെത്തണമെന്ന് അധികൃതർ നിർദേശിച്ചു.
റെസിഡൻസി നിയമങ്ങളും വിസാ ചട്ടങ്ങളും നടപടിക്രമങ്ങളും കൃത്യമായി പാലിക്കണമെന്നും ആഭ്യന്തര മന്ത്രാലയം എല്ലാവരോടും ആവശ്യപ്പെട്ടു.
