കുവൈറ്റ് സിറ്റി: കുവൈറ്റിൽ ട്രാഫിക് പെട്രോളിംഗിനിടെ കടുത്ത ജാഗ്രതയും മിന്നൽ വേഗത്തിലുള്ള ഇടപെടലുമായി പോലീസ് സേന. മെക്കാനിക്കൽ തകരാറിനെ തുടർന്ന് റോഡിൽ നിലച്ചുപോയ വാഹനത്തിന് പെട്ടെന്ന് തീപിടിച്ചപ്പോൾ, ട്രാഫിക് പോലീസ് ഉടൻ തന്നെ തീയണച്ച് വൻ ദുരന്തം ഒഴിവാക്കി.പതിവ് റോന്ത് ചുറ്റലിനിടെയാണ് യന്ത്രതകരാർ മൂലം വഴിയരികിൽ നിർത്തിയിട്ടിരുന്ന വാഹനം റോഡ് റെസ്ക്യൂ ടീമിന്റെ ശ്രദ്ധയിൽപ്പെടുന്നത്.
പോലീസ് ഉദ്യോഗസ്ഥർ ഉടൻ തന്നെ വാഹനം നിർത്തി ഡ്രൈവറുടെ ക്ഷേമം അന്വേഷിക്കുകയും കാർ മാറ്റിയിടുന്നതിനായി ടോ ട്രക്ക് വിളിക്കുകയും ചെയ്തു. എന്നാൽ മിനിറ്റുകൾക്കകം വാഹനത്തിൽ നിന്ന് പുക ഉയരുന്നത് ശ്രദ്ധയിൽപ്പെട്ട ഉദ്യോഗസ്ഥർ ഒട്ടും സമയം കളയാതെ തങ്ങളുടെ പട്രോൾ വാഹനത്തിലുണ്ടായിരുന്ന ഫയർ എക്സ്റ്റിംഗ്വിഷർ ഉപയോഗിച്ച് തീയണയ്ക്കാനുള്ള നടപടികൾ ആരംഭിച്ചു. പുക വലിയ രീതിയിലുള്ള തീപിടുത്തമായി മാറുന്നതിന് മുൻപ് തന്നെ സാഹചര്യം പൂർണ്ണമായും നിയന്ത്രണവിധേയമാക്കാൻ അവർക്കായി.
റോഡുകളിൽ ഗതാഗത സുരക്ഷ ഉറപ്പാക്കുന്നതിനൊപ്പം, യാത്രികർക്ക് അടിയന്തര സഹായം എത്തിക്കുന്നതിലും ട്രാഫിക്-റെസ്ക്യൂ ഉദ്യോഗസ്ഥർ വഹിക്കുന്ന നിർണ്ണായക പങ്ക് എടുത്തുകാണിക്കുന്നതാണ് ഈ സംഭവം. ഉദ്യോഗസ്ഥരുടെ ദ്രുതഗതിയിലുള്ള ഇടപെടൽ മൂലം ഡ്രൈവർ സുരക്ഷിതനായി രക്ഷപ്പെടുകയും വലിയൊരു അപകടം ഒഴിവാകുകയും ചെയ്തു.
