കുവൈറ്റ് സിറ്റി: രാജ്യത്തെ സുരക്ഷാ സജ്ജീകരണങ്ങളും ഫീൽഡ് വിഭാഗങ്ങളുടെ പ്രവർത്തനക്ഷമതയും വിലയിരുത്തുന്നതിനായി ആഭ്യന്തര മന്ത്രാലയം അണ്ടർ സെക്രട്ടറി മേജർ ജനറൽ അബ്ദുൾ വഹാബ് അൽ-വഹീബ് വിവിധ വകുപ്പുകളിൽ സന്ദർശനം നടത്തി.
സെക്യൂരിറ്റി ഡയറക്ടറേറ്റ് അഫയേഴ്സ് സെക്ടർ മേധാവി മേജർ ജനറൽ ഹമദ് അൽ മുനീഫി, ട്രാഫിക് ആൻഡ് ഓപ്പറേഷൻസ് അഫയേഴ്സ് സെക്ടർ മേധാവി ബ്രിഗേഡിയർ അബ്ദുള്ള അൽ അത്തീഖി എന്നിവർ ചേർന്ന് അദ്ദേഹത്തെ സ്വീകരിച്ചു. മന്ത്രാലയത്തിന് കീഴിലുള്ള ഫീൽഡ് വിഭാഗങ്ങളുടെ പ്രവർത്തന രീതികളും നിലവിൽ നടപ്പിലാക്കി വരുന്ന സുരക്ഷാ പദ്ധതികളും അദ്ദേഹം നേരിട്ട് വിലയിരുത്തി.
അടിയന്തര റിപ്പോർട്ടുകൾ ലഭിക്കുമ്പോൾ ദ്രുതഗതിയിലും കാര്യക്ഷമമായും നടപടികൾ സ്വീകരിക്കുന്നതിന് വിവിധ വിഭാഗങ്ങൾ തമ്മിലുള്ള സംയുക്ത ഏകോപനം ശക്തമാക്കാൻ അദ്ദേഹം നിർദ്ദേശിച്ചു. രാജ്യത്തിന്റെ സുരക്ഷയും ഫീൽഡ് സജ്ജീകരണങ്ങളും പരമാവധി ഉറപ്പാക്കാൻ ഉദ്യോഗസ്ഥരോട് അദ്ദേഹം ആവശ്യപ്പെട്ടു.
ഉദ്യോഗസ്ഥരുടെ അർപ്പണബോധത്തെയും കാര്യക്ഷമതയെയും പ്രശംസിച്ച അദ്ദേഹം, രാജ്യത്തിന്റെ സുരക്ഷയും സ്ഥിരതയും ഉറപ്പാക്കുന്നതിൽ അവരുടെ പങ്ക് വളരെ വലുതാണെന്ന് ഓർമ്മിപ്പിച്ചു. സുരക്ഷാ മേഖലയിൽ ഉയർന്ന നിലവാരത്തിലുള്ള ഉത്തരവാദിത്തം പുലർത്തുന്നതിൽ ഉദ്യോഗസ്ഥർ കാണിക്കുന്ന ആത്മാർത്ഥതയെ അദ്ദേഹം അഭിനന്ദിച്ചു.
