കുവൈറ്റ് സിറ്റി: കുവൈറ്റിൽ സമൂഹത്തിന്റെ സുരക്ഷ ഉറപ്പാക്കുന്നതിനും കുറ്റവാളികളെ കണ്ടെത്തുന്നതിനുമായി ആഭ്യന്തര മന്ത്രാലയം നടത്തുന്ന തിരച്ചിലിനിടയിൽ, ലൈസൻസില്ലാത്ത തോക്കും വെടിയുണ്ടകളുമായി ഒരാളെ സുരക്ഷാ ഉദ്യോഗസ്ഥർ പിടികൂടി. ക്രിമിനൽ സെക്യൂരിറ്റി സെക്ടർ നടത്തിയ കൃത്യമായ നിരീക്ഷണങ്ങൾക്കും അന്വേഷണങ്ങൾക്കും ഒടുവിലാണ് പ്രതി കുടുങ്ങിയത്.രഹസ്യവിവരം ലഭിച്ചതിനെത്തുടർന്ന് ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷൻ ഉദ്യോഗസ്ഥർ പബ്ലിക് പ്രോസിക്യൂഷന്റെ അനുമതിയോടെ പ്രതിയുടെ താമസസ്ഥലത്ത് മിന്നൽ പരിശോധന നടത്തുകയായിരുന്നു. ഈ പരിശോധനയിലാണ് നിയമവിരുദ്ധമായി സൂക്ഷിച്ചിരുന്ന തോക്കും വെടിയുണ്ടകളും കണ്ടെടുത്തത്. പ്രതിയെ ഉടൻ തന്നെ കസ്റ്റഡിയിലെടുക്കുകയും ആയുധങ്ങൾ കണ്ടുകെട്ടുകയും ചെയ്തു. ഇയാൾക്കെതിരെ നിയമനടപടികൾ ആരംഭിച്ചിട്ടുണ്ട്.ലൈസൻസില്ലാതെ ആയുധങ്ങൾ കൈവശം വെക്കുന്നത് കടുത്ത ശിക്ഷ ലഭിക്കാവുന്ന കുറ്റമാണെന്ന് സുരക്ഷാ ഉദ്യോഗസ്ഥർ വീണ്ടും ഓർമ്മിപ്പിച്ചു. പൊതുജന സുരക്ഷയ്ക്ക് ഭീഷണിയാകുന്ന ഏത് പ്രവർത്തനങ്ങളെയും കർശനമായി നേരിടുമെന്നും നിയമലംഘകർക്കെതിരെ വിട്ടുവീഴ്ചയില്ലാത്ത നടപടികൾ തുടരുമെന്നും അധികൃതർ വ്യക്തമാക്കി.
