കുവൈത്ത് സിറ്റി: മയക്കുമരുന്നുകളും സൈക്കോട്രോപിക് മരുന്നുകളുമായും ബന്ധപ്പെട്ട കേസുകളിൽ പത്ത് പേരെ അറസ്റ്റ് ചെയ്തതായി ആഭ്യന്തര മന്ത്രാലയം അറിയിച്ചു. ഇത് ആസൂത്രിതമായ റെയ്ഡുകളുടെ ഭാഗമാണ്. അൽ ഖുറൈൻ, വഫ്ര, അൻഡലോസ്, സാദ് അൽ അബ്ദുള്ള സിറ്റി, ഖൈറാൻ, സബാഹ് അൽ സലേം എന്നീ പ്രദേശങ്ങളിൽ നടന്ന സുരക്ഷാ ഓപ്പറേഷനുകളിലാണ് പ്രതികളെ പിടികൂടിയതെന്ന് ആഭ്യന്തര മന്ത്രാലയത്തിന്റെ സുരക്ഷാ വിവര വിഭാഗം പ്രസ്താവനയിൽ അറിയിച്ചു. ഈ ഓപ്പറേഷനുകളിൽ ആറ് കിലോഗ്രാം ഷാബു (മെത്താംഫെറ്റാമൈൻ) പദാർത്ഥങ്ങൾ, മൂന്ന് കിലോഗ്രാം ഹാഷിഷ്, 7000 ലൈറിക ഗുളികകൾ, വിവിധതരം തോക്കുകൾ, വെടിമരുന്ന്, സംശയാസ്പദമായ പണം എന്നിവ പിടിച്ചെടുത്തു. ഇത്തരം അപകടകരമായ പ്രവർത്തനങ്ങൾക്കെതിരെ സുരക്ഷാ സേന കർശനമായി നടപടിയെടുക്കുമെന്നും മുന്നറിയിപ്പ് നൽകി. സമൂഹത്തിന്റെ സുരക്ഷയെ കരുതി സുരക്ഷാ ഉദ്യോഗസ്ഥരുമായി സഹകരിക്കാനും സംശയാസ്പദമായ പ്രവർത്തനങ്ങൾ റിപ്പോർട്ട് ചെയ്യാനും പൗരന്മാരോടും താമസക്കാരോടും മന്ത്രാലയം അഭ്യർത്ഥിച്ചു.
