മനാമ: ബഹ്റൈനിലെ മനാമയിലുള്ള യുഎസ് നാവികസേനയുടെ അഞ്ചാം കപ്പൽപ്പടയുടെ ആസ്ഥാനത്തിനുനേരെ മിസൈൽ-ഡ്രോൺ ആക്രമണം നടത്തിയെന്ന് ഇറാൻ. ആക്രമണത്തിൽ 21 യുഎസ് സൈനികർ കൊല്ലപ്പെട്ടതായി ടെഹ്റാൻ ടൈംസ് റിപ്പോർട്ട് ചെയ്തു. അമേരിക്ക- ഇസ്രയേൽ സംയുക്ത ആക്രമണത്തിന് നൽകിയ മറുപടിയാണ് ഈ ആക്രമണമെന്ന് ഇറാൻ അവകാശപ്പെട്ടു.
ആക്രമണത്തിൽ കപ്പൽപ്പടയുടെ ആസ്ഥാനത്തെ റഡാർ സംവിധാനങ്ങൾ, കെട്ടിടങ്ങൾ, സാറ്റലൈറ്റ് കമ്മ്യൂണിക്കേഷൻ ടെർമിനലുകൾ എന്നിവ തകർന്നതായി ഇറാൻ അറിയിച്ചു. എന്നാൽ, സൈനികരെല്ലാവരം ബങ്കറുകളിലായിരുന്നുവെന്നും മരണം റിപ്പോർട്ട് ചെയ്തിട്ടില്ലെന്നുമാണ് യുഎസിന്റെ ഔദ്യോഗിക വിശദീകരണം.
ഫെബ്രുവരി 28-ന് ഇസ്ലാമിക് റെവല്യൂഷണറി ഗാർഡ് കോർ (IRGC) സമാന രീതിയിൽ യുഎസ് നാവികസേനയുടെ അഞ്ചാം കപ്പൽപ്പടയുടെ ആസ്ഥാനത്തിന് നേരെ മിസൈൽ ആക്രമണം നടത്തിയിരുന്നു. ഇതിന് മറുപടിയായി മാർച്ച് ആറിന് ഇന്ത്യൻ മഹാസമുദ്രത്തിൽവെച്ച് ഇറാന്റെ യുദ്ധക്കപ്പലിനെ യുഎസ് അന്തർവാഹിനി തകർത്തിരുന്നു.
