കുവൈറ്റ് സിറ്റി: മേഖലയിലെ പുതിയ സംഭവവികാസങ്ങളുടെ പശ്ചാത്തലത്തിൽ, രാജ്യത്തെ സുരക്ഷാ സാഹചര്യം പൂർണ്ണമായും നിയന്ത്രണവിധേയമാണെന്നും 24 മണിക്കൂറും കൃത്യമായ നിരീക്ഷണം നടക്കുന്നുണ്ടെന്നും കുവൈറ്റ് ആഭ്യന്തര മന്ത്രാലയം അറിയിച്ചു. ഉയർന്ന സജ്ജീകരണങ്ങളും കൃത്യമായ വിലയിരുത്തലുകളും ഉൾപ്പെടുന്ന ഒരു സംയോജിത സുരക്ഷാ സംവിധാനത്തിന് കീഴിലാണ് രാജ്യം ഇപ്പോൾ ഉള്ളതെന്ന് മന്ത്രാലയം വ്യക്തമാക്കി. രാജ്യത്തെ സുരക്ഷാ സജ്ജീകരണങ്ങൾ വർദ്ധിപ്പിക്കുകയും തന്ത്രപ്രധാനമായ സ്ഥലങ്ങളിൽ സുരക്ഷാ സേനയെ വിന്യസിക്കുകയും ചെയ്തിട്ടുണ്ട്. ഏത് സാഹചര്യത്തോടും അതിവേഗം പ്രതികരിക്കാൻ സേന സജ്ജമാണ്.
പൗരന്മാരുടെയും പ്രവാസികളുടെയും സുരക്ഷ ഉറപ്പാക്കുന്നതിനായി മറ്റ് സർക്കാർ സംവിധാനങ്ങളുമായി പൂർണ്ണമായ ഏകോപനത്തോടെയാണ് മന്ത്രാലയം പ്രവർത്തിക്കുന്നത്. തെറ്റായ വിവരങ്ങൾ കൈമാറരുതെന്നും ഔദ്യോഗിക സ്രോതസ്സുകളിൽ നിന്നുള്ള വാർത്തകൾ മാത്രം വിശ്വസിക്കണമെന്നും മന്ത്രാലയം ജനങ്ങളോട് അഭ്യർത്ഥിച്ചു. സമൂഹത്തിൽ ഭീതി പടർത്തുന്ന തരത്തിലുള്ള അഭ്യൂഹങ്ങൾ പ്രചരിപ്പിക്കുന്നവർക്കെതിരെയും തെറ്റായ വിവരങ്ങൾ നൽകുന്നവർക്കെതിരെയും കർശനമായ നിയമനടപടികൾ സ്വീകരിക്കും.രാജ്യത്തെ ക്രമസമാധാന നില തൃപ്തികരമാണെന്നും ആരും പരിഭ്രാന്തരാകേണ്ട സാഹചര്യമില്ലെന്നും ആഭ്യന്തര മന്ത്രാലയം എല്ലാവർക്കും ഉറപ്പുനൽകി.
