കുവൈറ്റ് സിറ്റി: 2026-2027 അധ്യയന വർഷത്തിന്റെ തുടക്കത്തോടനുബന്ധിച്ച് സ്കൂളുകൾക്ക് സമീപത്തെയും റോഡുകളിലെയും സുരക്ഷാ-ഗതാഗത സാഹചര്യങ്ങൾ ആഭ്യന്തര മന്ത്രാലയത്തിലെ പബ്ലിക് സെക്യൂരിറ്റി അഫയേഴ്സ് അസിസ്റ്റന്റ് അണ്ടർസെക്രട്ടറി മേജർ ജനറൽ ഹമദ് അൽ-മുനൈഫി, ട്രാഫിക് ആൻഡ് ഓപ്പറേഷൻസ് അഫയേഴ്സ് സെക്ടർ മേധാവി ബ്രിഗേഡിയർ ജനറൽ അഹമ്മദ് അൽ-അസ്മിയോടൊപ്പം ചേർന്ന് ഇന്നലെ വൈകുന്നേരം നേരിട്ട് പരിശോധിച്ചു. തിരക്കേറിയ സമയങ്ങളിൽ സുരക്ഷാ-ഗതാഗത പട്രോളിംഗുകളുടെ വിന്യാസം നിരീക്ഷിക്കുക, ഗതാഗതം സുഗമമാക്കുക, വാഹനങ്ങളുടെ നീക്കം നിയന്ത്രിക്കുക, ഗതാഗത തടസ്സങ്ങൾ ഉണ്ടായാൽ പെട്ടെന്ന് പരിഹരിക്കുക എന്നിവയായിരുന്നു പരിശോധനയുടെ ലക്ഷ്യം.
അധ്യയന വർഷം ആരംഭിച്ചതോടൊപ്പം വിപുലമായ സുരക്ഷാ-ഫീൽഡ് നടപടികളാണ് ആഭ്യന്തര മന്ത്രാലയം തയ്യാറാക്കിയിട്ടുള്ളത്. ഇതിന്റെ ഭാഗമായി സ്കൂളുകൾക്ക് ചുറ്റുമുള്ള പ്രദേശങ്ങളിലും പ്രധാന റോഡുകളിലും വിവിധ സുപ്രധാന കേന്ദ്രങ്ങളിലും പട്രോളിംഗ് ശക്തമാക്കിയിട്ടുണ്ട്. റോഡുകളിലെയും വാഹനങ്ങളുടെയും നീക്കം നിരീക്ഷിക്കുന്നതിനായി 870 സുരക്ഷാ-ട്രാഫിക് പട്രോളിംഗ് വാഹനങ്ങളും 338 ട്രാഫിക് നിരീക്ഷണ ക്യാമറകളും സജ്ജീകരിച്ചിട്ടുണ്ടെന്ന് മന്ത്രാലയം അറിയിച്ചു.
