കുവൈറ്റ് സിറ്റി: കുവൈറ്റ് സിറ്റിയിലുള്ള അമേരിക്കൻ എംബസിയുടെ പ്രവർത്തനങ്ങൾ താൽക്കാലികമായി നിർത്തിവെച്ചതായി യുഎസ് സ്റ്റേറ്റ് ഡിപ്പാർട്ട്മെന്റ് അറിയിച്ചു. എംബസി ഉദ്യോഗസ്ഥർക്ക് പരിക്കുകളൊന്നും റിപ്പോർട്ട് ചെയ്തിട്ടില്ലെങ്കിലും വിദേശത്തുള്ള അമേരിക്കൻ പൗരന്മാരുടെ സുരക്ഷയ്ക്കാണ് മുൻഗണനയെന്ന് ഡിപ്പാർട്ട്മെന്റ് വ്യക്തമാക്കി. കുവൈറ്റിലേക്കുള്ള യാത്രാ മുന്നറിയിപ്പ് ‘ലെവൽ 3’ (Reconsider Travel – യാത്ര പുനർചിന്തിക്കുക) ആയി തുടരുന്നു. ഏറ്റവും പുതിയ വിവരങ്ങൾക്കായി travel.state.gov സന്ദർശിക്കാൻ പൗരന്മാരോട് ആവശ്യപ്പെട്ടു.
സുരക്ഷിതമായി യാത്ര ചെയ്യാൻ സാധിക്കുന്നവർ കൊമേഴ്സ്യൽ വിമാനങ്ങളോ മറ്റ് ലഭ്യമായ മാർഗ്ഗങ്ങളോ ഉപയോഗിച്ച് കുവൈറ്റ് വിടാൻ അമേരിക്കൻ പൗരന്മാരോട് നിർദ്ദേശിച്ചു. രാജ്യം വിടാൻ സാധിക്കാത്തവർ സുരക്ഷിതമായ ഇടങ്ങളിൽ തന്നെ തുടരാൻ നിർദ്ദേശമുണ്ട്.
അടിയന്തര സഹായങ്ങൾക്കും കൗൺസിലർ സേവനങ്ങൾക്കുമായി 24 മണിക്കൂറും പ്രവർത്തിക്കുന്ന ഹെൽപ്പ് ലൈൻ നമ്പറുകൾ (+1-202-501-4444 അല്ലെങ്കിൽ +1-888-407-4747) നൽകിയിട്ടുണ്ട്. കൃത്യമായ വിവരങ്ങൾ തത്സമയം ലഭിക്കുന്നതിനായി സ്മാർട്ട് ട്രാവലർ എൻറോൾമെന്റ് പ്രോഗ്രാമിൽ പേര് രജിസ്റ്റർ ചെയ്യാൻ യാത്രക്കാരോട് മന്ത്രാലയം അഭ്യർത്ഥിച്ചു. മേഖലയിലെ അനിശ്ചിതത്വങ്ങൾക്കിടയിൽ മുൻകരുതൽ നടപടിയെന്ന നിലയിലാണ് അമേരിക്കൻ എംബസി ഈ തീരുമാനമെടുത്തത്.
