കുവൈറ്റ്സിറ്റി: കുവൈറ്റ് സ്റ്റേറ്റ് ജനറൽ റിസർവ് ഫണ്ടിന് ഫ്യൂച്ചർ ജനറേഷൻസ് റിസർവിൽ നിന്ന് വായ്പയെടുക്കാൻ അനുമതി നൽകി സെപ്റ്റംബർ 1-ന് പുറപ്പെടുവിച്ച ഉത്തരവ് രാജ്യത്തിന്റെ ക്രെഡിറ്റ് റേറ്റിംഗിന് അനുകൂലമാണെന്ന് അന്താരാഷ്ട്ര റേറ്റിംഗ് ഏജൻസിയായ മൂഡീസ് വ്യക്തമാക്കി. സർക്കാരിന്റെ കരുതൽ ധനശേഖരം പരമാവധി പ്രയോജനപ്പെടുത്താൻ സഹായിക്കുന്ന സ്ഥിരമായ ഒരു ഭരണസംവിധാനത്തിന് ഈ തീരുമാനം വഴിയൊരുക്കുമെന്നും മൂഡീസ് ചൂണ്ടിക്കാട്ടി.മധ്യപൂർവേഷ്യയിൽ തുടരുന്ന സൈനിക സംഘർഷങ്ങളുടെ പശ്ചാത്തലത്തിൽ കുവൈറ്റിനുണ്ടാകുന്ന സാമ്പത്തിക ഭാരവും ധനകമ്മിയും പരിഹരിക്കാൻ ഈ തുകയുടെ ഒരു ഭാഗം ഉപയോഗിക്കാൻ സാധിക്കും.
‘A1’ റേറ്റിംഗും സ്റ്റേബിൾ ഔട്ട്ലുക്കുമാണ് കുവൈറ്റിന് നിലവിൽ മൂഡീസ് നൽകിയിട്ടുള്ളത്. 2025 അവസാനത്തോടെ കുവൈറ്റ് ഇൻവെസ്റ്റ്മെന്റ് അതോറിറ്റി മാനേജ് ചെയ്യുന്ന സാമ്പത്തിക ആസ്തി ഏകദേശം 750 ബില്യൺ ഡോളറാണെന്ന് മൂഡീസ് കണക്കാക്കുന്നു. ഇത് രാജ്യത്തിന്റെ ജിഡിപിയുടെ 475 ശതമാനത്തിന് തുല്യമാണ്.പൊതു ധനകാര്യ മേഖലയ്ക്ക് കൂടുതൽ വഴക്കം നൽകുന്നതിനൊപ്പം, സർക്കാരിന്റെ ട്രഷറി അക്കൗണ്ടായ ജനറൽ റിസർവ് ഫണ്ടും ഇൻവെസ്റ്റ്മെന്റ് അതോറിറ്റിയുടെ പ്രധാന നിക്ഷേപ പോർട്ട്ഫോളിയോയായ ഫ്യൂച്ചർ ജനറേഷൻസ് റിസർവും തമ്മിലുള്ള ബന്ധത്തെ കൂടുതൽ വ്യക്തവും സുതാര്യവുമാക്കാൻ ഈ പുതിയ ഭേദഗതിക്ക് സാധിക്കുമെന്ന് മൂഡീസ് കൂട്ടിച്ചേർത്തു.
