കുവൈത്ത് സിറ്റി: 2026/2027 അക്കാദമിക് വർഷത്തിന്റെ തുടക്കത്തോടുകൂടി കുവൈത്ത് സർവകലാശാലയിലേക്ക് നാളെ (ഞായറാഴ്ച) 44,345 വിദ്യാർത്ഥികൾ എത്തും. ശാസ്ത്ര-സാഹിത്യ വിഭാഗങ്ങളിലെ വിവിധ കോളേജുകളിലായി 8,409 പുതിയ വിദ്യാർത്ഥികളാണ് ഇത്തവണ പ്രവേശനം നേടിയിട്ടുള്ളത്. സർവകലാശാലയിലെ 15 കോളേജുകളിലാണ് വിദ്യാർത്ഥികൾ എത്തുന്നത്.
അധ്യയന വർഷത്തിന്റെ ആദ്യ ദിനം മുതൽ തന്നെ ക്ലാസുകൾ സുഗമമായി മുന്നോട്ടു കൊണ്ടുപോകുന്നതിനുള്ള എല്ലാ ഒരുക്കങ്ങളും പൂർത്തിയായതായി സർവകലാശാല അധികൃതർ വാർത്താക്കുറിപ്പിൽ വ്യക്തമാക്കി. വിദ്യാർത്ഥികൾക്കും അധ്യാപകർക്കും ജീവനക്കാർക്കും സുരക്ഷിതവും അനുയോജ്യവുമായ പഠനാന്തരീക്ഷം ഒരുക്കുന്നതിന്റെ ഭാഗമായി ക്ലാസ് മുറികൾ, ലബോറട്ടറികൾ, പാർക്കിംഗ് ഏരിയകൾ എന്നിവയുൾപ്പെടെയുള്ള മുഴുവൻ ക്യാമ്പസ് സൗകര്യങ്ങളും സജ്ജമാക്കിയിട്ടുണ്ട്. ഭരണപരവും സാങ്കേതികവുമായ എല്ലാ ക്രമീകരണങ്ങളും പൂർത്തിയാക്കിയതായും അധികൃതർ അറിയിച്ചു.
