കുവൈറ്റ് സിറ്റി: കുവൈറ്റിന്റെ വടക്കൻ മേഖലയിൽ നിന്ന് ഫറവോണിക് ഈഗിൾ ഔൾ (Pharaoh Eagle Owl) ഇനത്തിൽപ്പെട്ട മൂങ്ങക്കുഞ്ഞിനെ രക്ഷപ്പെടുത്തി ശാസ്ത്രകേന്ദ്രത്തിലേക്ക് മാറ്റി. രക്ഷാപ്രവർത്തനത്തിന്റെ വിശദാംശങ്ങളാണ് അൽ റായ് പത്രം റിപ്പോർട്ട് ചെയ്തിരിക്കുന്നത്.മരുഭൂമി പ്രദേശങ്ങളിൽ കാണപ്പെടുന്ന ഈ ഇനം മൂങ്ങകൾ രാത്രികാലങ്ങളിൽ ഇരതേടുന്ന പക്ഷികളാണ്. ഫറവോണിക് ഈഗിൾ ഔൾ എന്നറിയപ്പെടുന്ന ഇവ വടക്കേ ആഫ്രിക്കയിലെയും മധ്യപൂർവദേശത്തെയും വരണ്ട പ്രദേശങ്ങളിൽ കാണപ്പെടുന്നു.രക്ഷപ്പെടുത്തിയ മൂങ്ങക്കുഞ്ഞിനെ കുവൈറ്റിലെ ശാസ്ത്രകേന്ദ്രത്തിലേക്ക് എത്തിച്ചതോടെ അതിന്റെ സംരക്ഷണത്തിനും പരിചരണത്തിനും അവസരമൊരുങ്ങി.
അൽ റായ് റിപ്പോർട്ട് പ്രകാരം, വന്യജീവി ഫോട്ടോഗ്രാഫറായ ഷത്തി അൽ ഷത്തിയും ഡോ. മുഹമ്മദ് അൽ മത്രൂക്കും ചേർന്നാണ് പരിക്കേറ്റ മൂങ്ങക്കുഞ്ഞിനെ രക്ഷപ്പെടുത്തിയത്. മരുഭൂമിയിലൂടെ സഞ്ചരിക്കുന്നതിനിടെയാണ് പറക്കാൻ കഴിയാതെ കിടക്കുന്ന മൂങ്ങക്കുഞ്ഞിനെ ഇവർ കണ്ടത്. പരിശോധനയിൽ ഒരു ചിറകിന് പരിക്കേറ്റതായി കണ്ടെത്തി.മൂങ്ങക്കുഞ്ഞിന്റെ അമ്മ സമീപത്ത് പറന്നുനടന്ന് നിരീക്ഷിക്കുന്നുണ്ടായിരുന്നു. അമ്മയിൽനിന്ന് കുഞ്ഞിനെ വേർപെടുത്താൻ ആദ്യം മടിച്ചെങ്കിലും പരിക്കേറ്റ നിലയിൽ മരുഭൂമിയിൽ ഉപേക്ഷിക്കുന്നത് അപകടകരമാണെന്ന് മനസ്സിലാക്കിയതോടെയാണ് ശാസ്ത്രകേന്ദ്രത്തിലേക്ക് കൊണ്ടുപോകാൻ തീരുമാനിച്ചത്.
ശാസ്ത്രകേന്ദ്രത്തിലെ ജീവനക്കാർ മൂങ്ങക്കുഞ്ഞിനെ ഏറ്റെടുത്ത് ആവശ്യമായ പരിചരണം നൽകി. പക്ഷിവേട്ടക്കാരിൽനിന്ന് പ്രദേശത്തെ മറ്റു പക്ഷികളെ സംരക്ഷിക്കുന്നതിനായി മൂങ്ങക്കുഞ്ഞിനെ കണ്ടെത്തിയ സ്ഥലം വെളിപ്പെടുത്തില്ലെന്ന് ഷത്തി അൽ ഷത്തി അറിയിച്ചു.വന്യജീവികളുടെ ചിത്രങ്ങൾ പകർത്തുന്നതിനൊപ്പം അവയുടെ സംരക്ഷണത്തിനും പ്രാധാന്യം നൽകേണ്ടതുണ്ടെന്ന് ഈ അനുഭവം ഓർമിപ്പിച്ചതായും അദ്ദേഹം പറഞ്ഞു.
