കുവൈത്ത് സിറ്റി, ജൂലൈ 18: ഇറാന്റെ തുടർച്ചയായ ആക്രമണങ്ങൾക്കിടെ കുവൈത്തിലെ മറ്റൊരു വൈദ്യുതി ഉൽപ്പാദന-ജല ശുദ്ധീകരണ നിലയവും ശത്രു ആക്രമണത്തിന് ഇരയായതായി വൈദ്യുതി, ജല, പുനരുപയോഗ ഊർജ മന്ത്രാലയം അറിയിച്ചു.
ആക്രമണത്തെ തുടർന്ന് നിലയത്തിലെ ഒരു പ്രധാന ഘടകത്തിൽ തീപിടിത്തമുണ്ടായി. ഇതിന്റെ പശ്ചാത്തലത്തിൽ നിലയത്തിന്റെ സുരക്ഷയും ജീവനക്കാരുടെ സുരക്ഷയും ഉറപ്പാക്കുന്നതിനായി മുൻകരുതൽ നടപടിയായി ചില വൈദ്യുതി ഉൽപ്പാദന യൂണിറ്റുകൾ താൽക്കാലികമായി പ്രവർത്തനരഹിതമാക്കിയതായി മന്ത്രാലയം വ്യക്തമാക്കി.
തീപിടിത്തം നിയന്ത്രണവിധേയമാക്കാൻ മന്ത്രാലയത്തിന്റെ അടിയന്തര പ്രതികരണ സംഘങ്ങൾ ജനറൽ ഫയർ ഫോഴ്സുമായും ബന്ധപ്പെട്ട മറ്റ് വകുപ്പുകളുമായും ചേർന്ന് പ്രവർത്തിക്കുന്നതായി അറിയിച്ചു.
സംഭവം ഉണ്ടായ ഉടൻ തന്നെ എല്ലാ അടിയന്തര പ്രവർത്തന പദ്ധതികളും സജീവമാക്കിയതായും വൈദ്യുതി, ജല വിതരണ സംവിധാനങ്ങളുടെ പ്രവർത്തനം തടസ്സപ്പെടാതിരിക്കാൻ ആവശ്യമായ എല്ലാ നടപടികളും സ്വീകരിച്ചിട്ടുണ്ടെന്നും മന്ത്രാലയം അറിയിച്ചു.
സാങ്കേതിക വിദഗ്ധരും പ്രവർത്തന സംഘങ്ങളും 24 മണിക്കൂറും സ്ഥിതിഗതികൾ നിരീക്ഷിച്ചുകൊണ്ടിരിക്കുകയാണെന്നും സേവനങ്ങളിൽ ഉണ്ടാകാവുന്ന പ്രതികൂല സ്വാധീനം പരമാവധി കുറയ്ക്കാൻ ശ്രമം തുടരുകയാണെന്നും മന്ത്രാലയം കൂട്ടിച്ചേർത്തു.
