കുവൈറ്റ് സിറ്റി: വരാനിരിക്കുന്ന മഴക്കാലത്തെ നേരിടാനുള്ള മുന്നൊരുക്കങ്ങളുടെ ഭാഗമായി ഹൈവേകളിലെ ടണലുകളിലെ മഴവെള്ള പമ്പിംഗ് സ്റ്റേഷനുകളുടെ അറ്റകുറ്റപ്പണികൾക്കും പ്രവർത്തനത്തിനുമുള്ള കരാറിലെ തുകയുടെ രണ്ടാമത്തെ സമയ നീട്ടത്തിന് ഓഡിറ്റ് ബ്യൂറോ അനുമതി നൽകി. 392,600 ദിനാർ മൂല്യമുള്ളതാണ് ഈ കരാർ.
ചില സ്ഥലങ്ങളിൽ വാഹനങ്ങളുടെ സുഗമമായ യാത്രയ്ക്ക് തടസ്സമാകുന്ന വെള്ളക്കെട്ടുകൾ ഒഴിവാക്കുന്നതിനായി അടിയന്തര കർമ്മസേനയുടെ നേതൃത്വത്തിൽ ശുചീകരണ പ്രവർത്തനങ്ങൾ നടന്നുവരികയാണെന്നും, മന്ത്രാലയം മഴക്കാലത്തിനായുള്ള തങ്ങളുടെ തയ്യാറെടുപ്പുകൾ തുടരുകയാണെന്നും പൊതുമരാമത്ത് മന്ത്രാലയത്തിലെ വൃത്തങ്ങൾ വ്യക്തമാക്കി.
തങ്ങളുടെ മേൽനോട്ടത്തിലുള്ള പ്രദേശങ്ങളിൽ പൂർണ്ണ സജ്ജീകരണം ഉറപ്പാക്കുന്നതിനായി ഈ വിഷയവുമായി ബന്ധപ്പെട്ട സാങ്കേതിക വിഭാഗങ്ങൾ ഒരുക്കങ്ങൾ വിലയിരുത്തി വരികയാണെന്ന് വൃത്തങ്ങൾ വിശദീകരിച്ചു. ബന്ധപ്പെട്ട വകുപ്പുകൾ നേരത്തെ തയ്യാറാക്കിയ പ്ലാനുകൾ അനുസരിച്ച് പെട്ടെന്ന് പ്രതികരിക്കാൻ എല്ലാ തൊഴിൽ സംഘങ്ങളും സജ്ജമാണെന്ന് ഉറപ്പാക്കിക്കൊണ്ട് പ്രവർത്തനങ്ങൾ തുടരുകയാണെന്നും അവർ കൂട്ടിച്ചേർത്തു.
