കുവൈത്ത് സിറ്റി: കുവൈത്തിലെ സ്വർണ്ണ വിപണിയിൽ കഴിഞ്ഞ വാരം രേഖപ്പെടുത്തിയത് ചരിത്രപരമായ വിലവർദ്ധനവ്. ദാർ അൽ-സബായിക് പുറത്തുവിട്ട റിപ്പോർട്ട് പ്രകാരം, 24 കാരറ്റ് സ്വർണ്ണത്തിന് ഗ്രാമിന് 44.30 ദിനാറും (ഏകദേശം 135 ഡോളർ), 22 കാരറ്റ് സ്വർണ്ണത്തിന് 40.61 ദിനാറും (ഏകദേശം 124 ഡോളർ) എന്ന റെക്കോർഡ് നിരക്കിലാണ് വ്യാപാരം നടന്നത്. സ്വർണ്ണത്തോടൊപ്പം വെള്ളി വിലയിലും വർദ്ധനവുണ്ടായി. കിലോയ്ക്ക് 875 ദിനാർ (ഏകദേശം 2,868 ഡോളർ) എന്ന നിലയിലേക്കാണ് വെള്ളി വില എത്തിയത്. ആഗോള വിപണിയിലെ വിലക്കയറ്റവും കറൻസി വിപണിയിലെ മാറ്റങ്ങളുമാണ് പ്രാദേശിക വിപണിയിലും പ്രതിഫലിച്ചത്. ആഗോളതലത്തിൽ സ്വർണ്ണവില ഔൺസിന് 4,550 ഡോളർ വരെ ഉയർന്ന ശേഷം 4,531 ഡോളറിലാണ് വ്യാപാരം അവസാനിപ്പിച്ചത്.ഭൗമരാഷ്ട്രീയ സംഘർഷങ്ങളും സാമ്പത്തിക അനിശ്ചിതത്വവുമാണ് നിക്ഷേപകരെ സുരക്ഷിത നിക്ഷേപമെന്ന നിലയിൽ സ്വർണ്ണത്തിലേക്ക് ആകർഷിക്കുന്നത്. വെനസ്വേലൻ എണ്ണക്കയറ്റുമതിക്ക് അമേരിക്ക ഏർപ്പെടുത്തിയ നിരോധനവും റഷ്യ-യുക്രെയ്ൻ യുദ്ധം തുടരുന്നതും ആഗോള വിപണിയിൽ ആശങ്ക വർദ്ധിപ്പിച്ചിട്ടുണ്ട്. കൂടാതെ, അമേരിക്കയിൽ പണപ്പെരുപ്പം കുറയുന്ന സാഹചര്യത്തിൽ അടുത്ത വർഷം പലിശനിരക്കിൽ രണ്ട് തവണയായി 0.25 ശതമാനം വീതം കുറവുണ്ടാകുമെന്ന പ്രതീക്ഷയും സ്വർണ്ണത്തിന് കരുത്തേകുന്നു. ഈ വർഷം മാത്രം സ്വർണ്ണവിലയിൽ 70 ശതമാനത്തിലധികം വർദ്ധനവാണുണ്ടായത്. 1979-ന് ശേഷമുള്ള ഏറ്റവും വലിയ വാർഷിക വർദ്ധനവാണിത്. വിവിധ രാജ്യങ്ങളിലെ കേന്ദ്ര ബാങ്കുകൾ വൻതോതിൽ സ്വർണ്ണം വാങ്ങിക്കൂട്ടുന്നതും ഇടിഎഫുകളിലേക്കുള്ള നിക്ഷേപ പ്രവാഹവും ഈ കുതിപ്പിന് പ്രധാന കാരണങ്ങളായി റിപ്പോർട്ടിൽ ചൂണ്ടിക്കാട്ടുന്നു.
