കുവൈത്ത് സിറ്റി, ജൂലൈ 16: ഇറാന്റെ ആക്രമണത്തിന്റെ പശ്ചാത്തലത്തിൽ ഇന്ന് പുലർച്ചെ മുതൽ കുവൈത്ത് വ്യോമാതിർത്തിയിൽ കടന്നുകയറിയ 32 ശത്രു ഡ്രോണുകളെ കുവൈത്ത് സായുധസേന വിജയകരമായി കണ്ടെത്തി തകർത്തതായി പ്രതിരോധ മന്ത്രാലയത്തിന്റെ ഔദ്യോഗിക വക്താവ് മേജർ ജനറൽ സൗദ് അബ്ദുൽഅസീസ് അൽ-ഒതൈബി അറിയിച്ചു.
ഇറാന്റെ ആക്രമണത്തിൽ രാജ്യത്തെ നിരവധി സുപ്രധാന അടിസ്ഥാന സൗകര്യങ്ങൾ ലക്ഷ്യമിട്ടതായി അദ്ദേഹം പറഞ്ഞു. ശത്രു ഡ്രോണുകളെ തടഞ്ഞുനശിപ്പിക്കുന്നതിനിടെ അവയുടെ അവശിഷ്ടങ്ങൾ വിവിധ താമസമേഖലകളിൽ വീണ് സ്വത്ത് നാശനഷ്ടങ്ങൾ ഉണ്ടായെങ്കിലും ആർക്കും പരിക്കേറ്റിട്ടില്ലെന്നും അദ്ദേഹം വ്യക്തമാക്കി.
രാജ്യത്തിന്റെ സുരക്ഷ ഉറപ്പാക്കുന്നതിനും പൗരന്മാരുടെയും പ്രവാസികളുടെയും ജീവൻ സംരക്ഷിക്കുന്നതിനുമായി കുവൈത്ത് സായുധസേന ഉയർന്ന ജാഗ്രതയോടെയും പൂർണ സജ്ജതയോടെയും തങ്ങളുടെ ദൗത്യങ്ങൾ തുടർന്നുകൊണ്ടിരിക്കുകയാണെന്നും പ്രതിരോധ മന്ത്രാലയം അറിയിച്ചു.
