കുവൈറ്റ് സിറ്റി/ഹൈദരാബാദ്: കുവൈറ്റിലെ അൽ-സാൽമി മരുഭൂമിയിൽ മലയാളി ഉൾപ്പെടെയുള്ള പ്രവാസി സമൂഹത്തെ ഞെട്ടിച്ചുകൊണ്ട് ഇന്ത്യൻ എൻജിനീയറുടെ മൃതദേഹം മണ്ണിൽ മൂടിയ നിലയിൽ കണ്ടെത്തിയ സംഭവത്തിൽ പുതിയ വെളിപ്പെടുത്തലുകൾ. തെലങ്കാനയിലെ നിസാമാബാദ് ജില്ലയിലുള്ള കൊരട്പള്ളി തന്ത സ്വദേശിയായ കൈലാഷ് (29) എന്ന മെക്കാനിക്കൽ എൻജിനീയറുടെ മരണത്തിലാണ് ദുരൂഹതയേറുന്നത്. സംഭവത്തിൽ നീതി ഉറപ്പാക്കണമെന്ന് ആവശ്യപ്പെട്ട് യുവാവിന്റെ കുടുംബം രംഗത്തെത്തിയിട്ടുണ്ട്. അതിനിടെ, കേസിൽ ഉൾപ്പെട്ട രണ്ടാമത്തെ പ്രതി കുവൈറ്റ് വിട്ടതായാണ് വിവരം. ഇയാളെ പിടികൂടാനുള്ള ശ്രമങ്ങൾ കുവൈറ്റ് അധികൃതർ ഊർജ്ജിതമാക്കി.മെച്ചപ്പെട്ട തൊഴിലവസരങ്ങൾ തേടിയാണ് കൈലാഷ് കുവൈറ്റിലെത്തിയത്. അൽ-സാൽമി മേഖലയിൽ മെക്കാനിക്കൽ എൻജിനീയറായി ജോലി ചെയ്തു വരികയായിരുന്നു ഇയാൾ. നാട്ടിൽ നിന്നുള്ള വിവരങ്ങൾ പ്രകാരം, തന്റെ ജന്മനാട്ടിൽ നിന്ന് തന്നെയുള്ള, കുവൈറ്റിൽ താമസിക്കുന്ന ഒരു അച്ഛനും മകനുമായി കൈലാഷ് അടുത്തിടെ സൗഹൃദത്തിലായിരുന്നു. കഴിഞ്ഞ മാർച്ച് 19-ന് കേടായ ഒരു ഹിറ്റാച്ചി (എക്സ്കവേറ്റർ) നന്നാക്കാനായി ഇവർ കൈലാഷിനെ മരുഭൂമിയിലെ വിജനമായ ഒരു സ്ഥലത്തേക്ക് കൂട്ടിക്കൊണ്ടുപോയി. യന്ത്രം നന്നാക്കുന്നതിനിടയിൽ ഉണ്ടായ ഒരു തൊഴിൽ അപകടത്തിലാണ് കൈലാഷ് മരിച്ചതെന്നാണ് അന്വേഷണ ഉദ്യോഗസ്ഥരുടെ പ്രാഥമിക നിഗമനം. എന്നാൽ, അപകടവിവരം പോലീസിനെയോ അധികൃതരെയോ അറിയിക്കുന്നതിന് പകരം, നിയമനടപടികളെ ഭയന്ന പ്രതികൾ പരിഭ്രാന്തരായി കൈലാഷിന്റെ മൃതദേഹം അൽ-സാൽമി മരുഭൂമിയിൽ കുഴിച്ചിടുകയും വിവരം രഹസ്യമാക്കി വെക്കുകയുമായിരുന്നു.കൈലാഷിനെ കാണാതായതോടെ കുവൈറ്റിലുള്ള ബന്ധുക്കൾ പോലീസിൽ പരാതി നൽകിയിരുന്നു. എന്നാൽ മേഖലയിലെ സുരക്ഷാ പ്രശ്നങ്ങൾ കാരണം ആദ്യഘട്ടത്തിൽ അന്വേഷണം പതുക്കെയാണ് മുന്നോട്ട് പോയത്.
തുടർന്ന് കുവൈറ്റ് ക്രിമിനൽ ഇൻവെസ്റ്റിഗേഷൻ ഡിപ്പാർട്ട്മെന്റ് (CID) പ്രദേശത്തെ സിസിടിവി ദൃശ്യങ്ങളും മറ്റ് തെളിവുകളും സൂക്ഷ്മമായി പരിശോധിച്ചതോടെയാണ് പ്രതികളിലൊരാളിലേക്ക് അന്വേഷണം എത്തിയത്. കസ്റ്റഡിയിലെടുത്ത് ചോദ്യം ചെയ്തതോടെ ഇയാൾ കുറ്റം സമ്മതിക്കുകയും മൃതദേഹം ഒളിപ്പിച്ച സ്ഥലം കാണിച്ചുതരികയുമായിരുന്നു. ഇതോടെ മാസങ്ങൾ നീണ്ട കാണാതാകൽ നിഗൂഢതയ്ക്കാണ് വിരാമമായത്.കേസ് വെളിച്ചത്തുവരുന്നതിന് മുൻപ് തന്നെ രണ്ടാമത്തെ പ്രതി രാജ്യം വിട്ടതായി കുവൈറ്റ് അന്വേഷണസംഘം സ്ഥിരീകരിച്ചു. അന്താരാഷ്ട്ര നിയമസംവിധാനങ്ങൾ വഴിയും മറ്റ് ഏജൻസികളുമായി ഏകോപിപ്പിച്ചും ഇയാളെ കണ്ടെത്താനുള്ള ശ്രമങ്ങൾ തുടരുകയാണ്.
അതേസമയം, ഈ ദാരുണ വാർത്ത കൈലാഷിന്റെ ജന്മനാടായ തെലങ്കാനയിലെ ഗ്രാമത്തെ ഞെട്ടിച്ചിരിക്കുകയാണ്. പ്രതികളിലൊരാളായ ഗണേഷ് എന്നയാൾ യാതൊരു സംശയത്തിനും ഇടനൽകാതെ ഇന്ത്യയിലേക്ക് മടങ്ങിയെത്തിയതായാണ് ഇന്ത്യൻ മാധ്യമങ്ങൾ റിപ്പോർട്ട് ചെയ്യുന്നത്. മരണവിവരമറിഞ്ഞ കൈലാഷിന്റെ കുടുംബം കുറ്റക്കാർക്കെതിരെ നടപടി ആവശ്യപ്പെട്ട് നിസാമാബാദ് പോലീസിനെ സമീപിച്ചു. ഇന്ത്യൻ അധികൃതർ പരാതി രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. പ്രതികളെ നിയമത്തിന് മുന്നിൽ കൊണ്ടുവരാൻ ഇന്ത്യൻ-കുവൈറ്റ് സർക്കാരുകൾ അടിയന്തിരമായി ഇടപെടണമെന്ന് കുടുംബം അഭ്യർത്ഥിച്ചു.
തൊഴിലിടങ്ങളിലെ അപകടമരണങ്ങൾ മറച്ചുവെക്കുന്നതും ക്രിമിനൽ ബാധ്യതയിൽ നിന്ന് ഒളിച്ചോടാൻ മൃതദേഹം ഒളിപ്പിക്കുന്നതും ഗുരുതരമായ നിയമലംഘനമാണെന്ന് കുവൈറ്റ് അധികൃതർ ഓർമ്മിപ്പിച്ചു. കേസിന്റെ ഫോറൻസിക് പരിശോധനകളും മറ്റ് നിയമനടപടികളും പുരോഗമിക്കുകയാണെന്നും ഒളിവിലുള്ള പ്രതിയെ കോടതിക്ക് മുന്നിൽ ഹാജരാക്കുമെന്നും സുരക്ഷാ വിഭാഗം വ്യക്തമാക്കി. യുവ എൻജിനീയറുടെ ദാരുണാന്ത്യം പ്രവാസി തൊഴിലാളികളുടെ നിയമപരമായ സുരക്ഷയെക്കുറിച്ചും തൊഴിലിടങ്ങളിലെ അപകടങ്ങൾ യഥാസമയം റിപ്പോർട്ട് ചെയ്യേണ്ടതിന്റെ പ്രാധാന്യത്തെക്കുറിച്ചുമുള്ള ചർച്ചകൾക്ക് വീണ്ടും വഴിതുറന്നിരിക്കുകയാണ്.
