കുവൈത്ത്സിറ്റി: വേനൽക്കാലത്ത് വർദ്ധിച്ചുവരുന്ന തീപിടുത്തങ്ങൾ, മുങ്ങിമരണങ്ങൾ എന്നിവയ്ക്കെതിരെ ജനങ്ങളിൽ അവബോധം വളർത്തുന്നതിനായി ജനറൽ ഫയർ ഫോഴ്സ് സംഘടിപ്പിക്കുന്ന ‘സുരക്ഷിത വേനൽക്കാലം അഗ്നിശമന സേനയ്ക്കൊപ്പം’ (Safe Summer with the Fire Department) പ്രചാരണ പരിപാടി ക്യാപിറ്റൽ മാളിൽ തുടർന്നു. ഫയർ ഫോഴ്സ് പബ്ലിക് റിലേഷൻസ് ആൻഡ് മീഡിയ വിഭാഗത്തിന്റെ നേതൃത്വത്തിലാണ് പരിപാടി സംഘടിപ്പിക്കുന്നത്. അപകടസാധ്യതകൾ കുറയ്ക്കുന്നതിനും സുരക്ഷാ മുൻകരുതലുകൾ സമൂഹത്തിൽ ഉറപ്പുവരുത്തുന്നതിനുമാണ് ഈ പദ്ധതി ലക്ഷ്യമിടുന്നത്.
വേനൽക്കാലം മുഴുവൻ നീണ്ടുനിൽക്കുന്ന വൈവിധ്യമാർന്ന ബോധവൽക്കരണ പരിപാടികളാണ് പ്രചാരണത്തിന്റെ ഭാഗമായി ആസൂത്രണം ചെയ്തിരിക്കുന്നത്. ഫീൽഡ് എക്സിബിഷനുകൾ, ബോധവൽക്കരണ ക്ലാസുകൾ, സമുദ്ര നിരീക്ഷണ പട്രോളിംഗുകൾ, പ്രമുഖ ഷോപ്പിംഗ് മാളുകൾ, സർക്കാർ-സ്വകാര്യ സ്ഥാപനങ്ങൾ എന്നിവിടങ്ങളിലെ സന്ദർശനങ്ങൾ എന്നിവ ഇതിൽ ഉൾപ്പെടുന്നു.അടിയന്തര ഘട്ടങ്ങളിൽ സ്വീകരിക്കേണ്ട മുൻകരുതലുകൾ, തീപിടുത്തങ്ങളും മറ്റ് അപകടങ്ങളും ഒഴിവാക്കുന്നതിനുള്ള മാർഗ്ഗങ്ങൾ, സുരക്ഷാ മാനദണ്ഡങ്ങൾ പാലിക്കേണ്ടതിന്റെ ആവശ്യകത എന്നിവയെക്കുറിച്ചുള്ള വ്യക്തമായ നിർദ്ദേശങ്ങൾ പൊതുജനങ്ങൾക്ക് നൽകാൻ ഈ ക്യാമ്പയിനിലൂടെ അഗ്നിശമന സേന ലക്ഷ്യമിടുന്നു.
