കുവൈത്ത് സിറ്റി: കുവൈത്തിലെ അൽ വഫ്ര പ്രദേശത്ത് അനധികൃതമായി മണൽ കടത്തിയ സംഘത്തെ സുരക്ഷാ അധികൃതർ പിടികൂടി. സംഭവവുമായി ബന്ധപ്പെട്ട് രണ്ട് സിറിയൻ സ്വദേശികളെ അറസ്റ്റ് ചെയ്തു.പ്രദേശത്ത് അനുമതിയില്ലാതെ മണൽ ശേഖരിക്കുകയും കടത്തുകയും ചെയ്ത സംഭവത്തിലാണ് നടപടി സ്വീകരിച്ചത്.രാജ്യത്തെ പ്രകൃതിവിഭവങ്ങൾ സംരക്ഷിക്കുന്നതിനും അനധികൃത മണൽ ഖനനവും കടത്തും തടയുന്നതിനുമുള്ള നടപടികളുടെ ഭാഗമായാണ് അധികൃതരുടെ ഇടപെടൽ.
അഹമ്മദി ഗവർണറേറ്റ് ക്രിമിനൽ ഇൻവെസ്റ്റിഗേഷൻ വിഭാഗമാണ് പരിശോധന നടത്തി പ്രതികളെ പിടികൂടിയത്. രണ്ട് ട്രക്കുകളും ഒരു എക്സ്കവേറ്ററും ഉപയോഗിച്ച് സർക്കാർ ഭൂമിയിൽനിന്ന് മണൽ ശേഖരിക്കുന്നതിനിടെയാണ് പ്രതികളെ കണ്ടെത്തിയത്.അന്വേഷണത്തിൽ ഒരു ട്രക്ക് പ്രതിമാസം 141 ദിനാറിനും എക്സ്കവേറ്റർ 193 ദിനാറിനും വാടകയ്ക്കെടുത്തതാണെന്ന് വ്യക്തമായി.അൽ വഫ്രയിലെ കൃഷിയിടങ്ങളുടെ ഉടമകൾക്ക് ഒരു ലോഡ് മണൽ 15 ദിനാർ നിരക്കിലാണ് പ്രതികൾ വിറ്റിരുന്നത്. ഇതിലൂടെ ലഭിച്ച പണം വ്യക്തിപരമായ ആവശ്യങ്ങൾക്കായി ഉപയോഗിച്ചിരുന്നതായി പ്രതികൾ ചോദ്യം ചെയ്യലിൽ സമ്മതിച്ചതായി ആഭ്യന്തര മന്ത്രാലയം അറിയിച്ചു.
സർക്കാർ ഭൂമിയിലെ മണലും മറ്റ് പ്രകൃതിവിഭവങ്ങളും രാജ്യത്തിന്റെ പൊതുസ്വത്താണെന്നും അവ അനധികൃതമായി ശേഖരിക്കുന്നതും വിൽക്കുന്നതും ഗുരുതരമായ കുറ്റമാണെന്നും മന്ത്രാലയം വ്യക്തമാക്കി.1993ലെ ഒന്നാം നമ്പർ പൊതുഫണ്ട് സംരക്ഷണ നിയമപ്രകാരം ഇത്തരം പ്രവർത്തനങ്ങൾ, നിയമപരമായ വ്യവസ്ഥകൾ നിറവേറ്റുന്ന സാഹചര്യത്തിൽ, സാധാരണ മോഷണക്കുറ്റത്തിന് പകരം ഗുരുതരമായ ക്രിമിനൽ കുറ്റമായി പരിഗണിക്കപ്പെടാം.രാജ്യത്തിന്റെ പ്രകൃതിവിഭവങ്ങളും പൊതുസ്വത്തും അനധികൃതമായി ചൂഷണം ചെയ്യുന്നവർക്കെതിരെ കർശന നടപടികൾ തുടരുമെന്നും ആഭ്യന്തര മന്ത്രാലയം മുന്നറിയിപ്പ് നൽകി.
