കുവൈത്ത് സിറ്റി: കുവൈത്തിലെ പ്രധാന വിനോദസഞ്ചാര കേന്ദ്രങ്ങളിലൊന്നായ ‘ജൂൺ’ (Joun) വിനോദകേന്ദ്രത്തിന്റെ മൂന്നാം സീസൺ ആരംഭിച്ചു. അറേബ്യൻ ഗൾഫ് തീരത്ത് കുവൈത്ത് ടവറിന് സമീപം സ്ഥിതിചെയ്യുന്ന വിനോദകേന്ദ്രം നവംബർ അഞ്ചിന് വ്യാഴാഴ്ചയാണ് ടൂറിസ്റ്റിക് എന്റർപ്രൈസസ് കമ്പനി പൊതുജനങ്ങൾക്കായി തുറന്നുകൊടുത്തത്.കുവൈത്തിന്റെ പരമ്പരാഗത സാംസ്കാരിക പൈതൃകവും ആധുനിക വിനോദസൗകര്യങ്ങളും ഒരുമിപ്പിക്കുന്ന രീതിയിലാണ് കേന്ദ്രം ഒരുക്കിയിരിക്കുന്നത്. കുടുംബങ്ങൾക്കും സുഹൃത്തുക്കൾക്കും കടൽത്തീരത്തെ മനോഹരമായ അന്തരീക്ഷത്തിൽ സമയം ചെലവഴിക്കാനുള്ള നിരവധി സൗകര്യങ്ങൾ ഇവിടെയുണ്ട്.
വിവിധ രാജ്യങ്ങളിലെ രുചിവൈവിധ്യങ്ങൾ പരിചയപ്പെടുത്തുന്ന റെസ്റ്റോറന്റുകൾ, കഫേകൾ, ഷോപ്പിങ് കേന്ദ്രങ്ങൾ എന്നിവയ്ക്ക് പുറമെ സായാഹ്ന പരിപാടികൾക്കും സംഗീതനിശകൾക്കും പ്രത്യേക സ്ഥലങ്ങളും സജ്ജീകരിച്ചിട്ടുണ്ട്.കുവൈത്തിന്റെ സമുദ്രചരിത്രവുമായി അടുത്ത ബന്ധമുള്ള ‘ജൂൺ അൽ കുവൈത്ത്’ അഥവാ കുവൈത്ത് ഉൾക്കടലിൽ നിന്നാണ് വിനോദകേന്ദ്രത്തിന് ‘ജൂൺ’ എന്ന പേര് ലഭിച്ചത്. രാജ്യത്തിന്റെ പാരമ്പര്യവും ആധുനിക വിനോദാനുഭവങ്ങളും ഒരേ സ്ഥലത്ത് അവതരിപ്പിക്കുകയാണ് പദ്ധതിയുടെ പ്രത്യേകത.
കഴിഞ്ഞ രണ്ട് സീസണുകളിലും കുവൈത്തിനകത്തുനിന്നും വിദേശത്തുനിന്നുമുള്ള സന്ദർശകരുടെ വലിയ തിരക്കാണ് ഇവിടെ അനുഭവപ്പെട്ടത്.രാജ്യത്തെ വിനോദസഞ്ചാര സൗകര്യങ്ങൾ വികസിപ്പിക്കുന്നതിനും ആഭ്യന്തര ടൂറിസം പ്രോത്സാഹിപ്പിക്കുന്നതിനുമുള്ള പദ്ധതികളുടെ ഭാഗമായാണ് മൂന്നാം സീസൺ ആരംഭിച്ചതെന്ന് ടൂറിസ്റ്റിക് എന്റർപ്രൈസസ് കമ്പനി അറിയിച്ചു.
