കുവൈത്ത് സിറ്റി: കുവൈത്തിലെ സബാഹിയ പ്രദേശത്ത് താമസമേഖലകളിൽ ആവശ്യമായ ലൈസൻസില്ലാതെ പ്രവർത്തിച്ചിരുന്ന ഗ്രോസറി കടകൾക്കെതിരെ അധികൃതർ നടത്തിയ പരിശോധനയിൽ നാല് ഏഷ്യൻ പ്രവാസികൾ അറസ്റ്റിലായി.
ആഭ്യന്തര മന്ത്രാലയത്തിന് കീഴിലുള്ള അഹമ്മദി ഗവർണറേറ്റ് ക്രിമിനൽ ഇൻവെസ്റ്റിഗേഷൻ വിഭാഗവും പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷനും സംയുക്തമായി നടത്തിയ പരിശോധനയിലാണ് നിയമലംഘനങ്ങൾ കണ്ടെത്തിയത്.താമസമേഖലകളിൽ ഔദ്യോഗിക അനുമതിയില്ലാതെ പ്രവർത്തിക്കുന്ന വ്യാപാര സ്ഥാപനങ്ങളെ കണ്ടെത്തുന്നതിനും അനധികൃത കച്ചവടങ്ങൾ തടയുന്നതിനുമുള്ള നടപടികളുടെ ഭാഗമായാണ് പരിശോധന നടത്തിയത്.
പരിശോധനയ്ക്കിടെ ലൈസൻസില്ലാതെ പ്രവർത്തിച്ചിരുന്ന ഗ്രോസറി കടകളിൽ ജോലി ചെയ്തിരുന്ന നാല് ഏഷ്യൻ പ്രവാസികളെ സുരക്ഷാ ഉദ്യോഗസ്ഥർ അറസ്റ്റ് ചെയ്യുകയായിരുന്നു.നിയമലംഘനം കണ്ടെത്തിയ സ്ഥാപനങ്ങൾക്കെതിരെ ഭക്ഷ്യസുരക്ഷാ അതോറിറ്റി നിയമലംഘന റിപ്പോർട്ടുകൾ തയ്യാറാക്കുകയും തുടർ നിയമനടപടികൾ ആരംഭിക്കുകയും ചെയ്തു.
താമസമേഖലകളിൽ അനുമതിയില്ലാതെ പ്രവർത്തിക്കുന്ന വ്യാപാര സ്ഥാപനങ്ങൾക്കെതിരെയുള്ള പരിശോധനകൾ തുടരുമെന്ന് ആഭ്യന്തര മന്ത്രാലയം വ്യക്തമാക്കി. നിയമലംഘകരെ കണ്ടെത്തുന്നതിനും രാജ്യത്തെ വാണിജ്യ പ്രവർത്തനങ്ങൾ നിയമാനുസൃതമാണെന്ന് ഉറപ്പാക്കുന്നതിനും വിവിധ സർക്കാർ വകുപ്പുകൾ സംയുക്തമായി പരിശോധനകൾ നടത്തുമെന്നും അധികൃതർ അറിയിച്ചു.
