കുവൈത്ത് സിറ്റി: കുവൈത്തിലെ അമീരി ആശുപത്രിയിൽ ഔദ്യോഗിക കൃത്യനിർവഹണത്തിനിടെ ഡോക്ടറെ വാക്കാൽ അധിക്ഷേപിച്ച പ്രവാസിക്ക് 3,000 കുവൈത്ത് ദിനാർ നഷ്ടപരിഹാരം നൽകാൻ സിവിൽ കോടതി ഉത്തരവിട്ടു.ഇതേ സംഭവത്തിൽ നേരത്തെ ക്രിമിനൽ കോടതി പ്രവാസിക്ക് 500 ദിനാർ പിഴ ചുമത്തിയിരുന്നു. ഈ വിധി അന്തിമമായതിന് പിന്നാലെയാണ് ഡോക്ടർക്ക് നഷ്ടപരിഹാരം നൽകണമെന്ന് ആവശ്യപ്പെട്ട് സിവിൽ കോടതിയെ സമീപിച്ചത്.കുവൈത്ത് മെഡിക്കൽ അസോസിയേഷനുവേണ്ടി അഭിഭാഷകയായ ഡോ. ഇലാഫ് അൽ സാലിഹാണ് ഡോക്ടറെ പ്രതിനിധീകരിച്ച് നഷ്ടപരിഹാര കേസ് ഫയൽ ചെയ്തത്.
ആശുപത്രിയിൽ ജോലി നിർവഹിക്കുന്നതിനിടെ പ്രവാസി നടത്തിയ വാക്കാലുള്ള അധിക്ഷേപം ഡോക്ടർക്ക് മാനസികമായ ബുദ്ധിമുട്ടുകൾ സൃഷ്ടിച്ചുവെന്ന് ചൂണ്ടിക്കാട്ടിയാണ് നഷ്ടപരിഹാരം ആവശ്യപ്പെട്ടത്.കേസിലെ സാഹചര്യങ്ങളും നേരത്തെ ഉണ്ടായ ക്രിമിനൽ കോടതി വിധിയും പരിഗണിച്ച സിവിൽ കോടതി, പ്രവാസി ഡോക്ടർക്ക് 3,000 ദിനാർ നഷ്ടപരിഹാരം നൽകണമെന്ന് ഉത്തരവിടുകയായിരുന്നു.ഇതോടെ സംഭവവുമായി ബന്ധപ്പെട്ട് പ്രവാസിക്ക് 500 ദിനാർ പിഴയും 3,000 ദിനാർ നഷ്ടപരിഹാരവും ഉൾപ്പെടെ ആകെ 3,500 ദിനാറിന്റെ സാമ്പത്തിക ബാധ്യതയാണ് ഉണ്ടായിരിക്കുന്നത്.
ആശുപത്രികളിൽ ജോലി ചെയ്യുന്ന ഡോക്ടർമാരെയും മറ്റ് ആരോഗ്യപ്രവർത്തകരെയും അധിക്ഷേപിക്കുന്നതും അപമാനിക്കുന്നതും ഗുരുതരമായ നിയമപ്രത്യാഘാതങ്ങൾക്ക് ഇടയാക്കുമെന്ന മുന്നറിയിപ്പാണ് ഈ കോടതി വിധി നൽകുന്നത്.കുവൈത്തിൽ ഔദ്യോഗിക കൃത്യനിർവഹണത്തിനിടെ ആരോഗ്യപ്രവർത്തകരെ വാക്കാൽ അധിക്ഷേപിക്കുന്നവർക്കെതിരെ ക്രിമിനൽ നടപടികൾക്ക് പുറമെ സിവിൽ കോടതിയിലൂടെ നഷ്ടപരിഹാരവും ആവശ്യപ്പെടാൻ കഴിയുമെന്നതും ഈ കേസ് വ്യക്തമാക്കുന്നു.
