കുവൈറ്റ് സിറ്റി : എയർ ഇന്ത്യ എക്സ്പ്രസ് ഖത്തറിലേക്കും ബഹ്റൈനിലേക്കും സർവീസുകൾ ഏപ്രിൽ 30 മുതൽ വീണ്ടും ആരംഭിച്ചതായി അറിയിച്ചു. ഇതോടൊപ്പം, യുഎഇ, സൗദി അറേബ്യ, ഒമാൻ എന്നീ രാജ്യങ്ങളിലേക്കുള്ള സർവീസുകളും വർധിപ്പിച്ച് ഗൾഫ് മേഖലയിലെ ദിനസർവീസുകൾ 40-ൽ കൂടുതലാക്കി.
ഡൽഹി, മുംബൈ, ബെംഗളൂരു പോലുള്ള പ്രധാന നഗരങ്ങളിൽ നിന്നുമാത്രമല്ല, കണ്ണൂർ, കോഴിക്കോട്, മംഗളൂരു പോലുള്ള പ്രാദേശിക കേന്ദ്രങ്ങളിൽ നിന്നുമുള്ള സർവീസുകളും ശക്തമാക്കി. യുഎഇയിൽ ദുബൈ, അബുദാബി, ഷാർജ, റാസ് അൽ ഖൈമ, അൽ ഐൻ എന്നിവിടങ്ങളിലേക്കും, മസ്കത്ത്, ജിദ്ദ, റിയാദ്, ദമ്മാം എന്നിവിടങ്ങളിലേക്കും സർവീസുകൾ തുടരും.
ഖത്തറും ബഹ്റൈനും ഉൾപ്പെടെയുള്ള പ്രധാന ഗൾഫ് കേന്ദ്രങ്ങളിലേക്കുള്ള സർവീസുകളുടെ പുനരാരംഭം, ഇന്ത്യ-ഗൾഫ് യാത്രാ ബന്ധം കൂടുതൽ ശക്തമാക്കുകയും ബിസിനസ്, വിനോദ യാത്രക്കാർക്ക് കൂടുതൽ സൗകര്യം നൽകുകയും ചെയ്യുമെന്ന് എയർലൈൻ അറിയിച്ചു. എയർ ഇന്ത്യയുടെ കുവൈറ്റ് സർവീസ് ഉടൻ ആരംഭിക്കുമെന്ന പ്രതീക്ഷയിലാണ് കുവൈറ്റ് പ്രവാസികൾ.
